Shillong, Nailar 09 : Ka Rangdajied United FC ka la ïoh ban don mynta ha ka kyrdan kaba lai da ki 15 point hadien ba ka la ïoh ban pynliem noh haduh 3-0 kol ïa ka Nangkiew Irat ha ka Shillong Premier League kaba long ha kane ka janmiet sngi Ba-ar ha madan Third Ground, Polo, Shillong.
Kumban shu kdew hangne, ka Rangdajied United ka la pynliem da 3-1 kol ha ka kylla kaba nyngkong ïa ka Nangkiew Irat kaba long ha ka 12tarik u Naitung.
Shwa jong kane ka jingïakhun, kitei ki ar tylli ki kynhun ki don ha ka kyrdan kaba saw bad ba san, ha kaba ka Rangdajied United ka la ïoh ban lamkhmat da 3 point ïa ka Nangkiew kaba don 9 point. Kumta da ka jingjop ha katei ka sngi, ka Rangdajied ka la kiew mynta sha ka kyrdan kaba lai da ki 15 point katba ka Nangkiew pat ka neh hajuh ha ka kyrdan kaba san da ki 9 point.
Kitei ki lai tylli ki kol ba ka Rangdajied ka ïoh kidei lyngba u Raikutshisha Buam ha ka minit kaba 13 bad ka minit kaba 52, ïa kawei pat ka kol la ïoh ban thep da u Oresterwell Langshiang ha minit kaba 33.
Ka Rangdajied hadien ba ka la ïoh ban thep haduh ar kol ha ka kylla step, hynrei ka dang bteng ban ïalehkai bha wat ha ka kylla miet ruh. Khyndiat minit mar ïa sdang Donboklang Lyngdoh u la ïoh ban khyrwit jam bha ïa ka bol hynrei u rangap kol ka kynhun u la ïoh ban khanglad ba kan rung sha kol. Sa shisien pat da kaba shim kabu ïa ki rangap dien, u Raikut ha ka minit kaba 52 u la ïoh ban thep biang sa shi kol, kaba dei ka kol kaba 80 ha katei ka lympung kaba la pynheh mynsiem artad ïa ka kynhun ban khur suk ïa ki lai point ha katei ka janmiet.
Utei u rangïalehkai u la dei ban ïoh hat trick lada dei ba ka bol kaba u khyrwit biang kham hadien ka leit sha kol.
Ka Nangkiew Irat watla ki ïoh katto katne ki kabu ksiar ban thep kol pynban kim shym da lah than ban pynsyier ïa u rangap kol ka kynhun Rangdajied u Banshanlang Sten.
Ki paidbah ieit phutbol kin sakhi ruh ïa ka jingïakhun kaba itynnad bha kaban long ha kane ka sngi Balang hapdeng ka Shillong Lajong pyrshah ïa ka Ryntih. Ka jingïakhun hapdeng kitei ki ar kynhun ha ka first leg ka la kut da kaba ka Ryntih ka ïoh ban thep haduh 3kol la nod.
Ki bor pynïaid jong katei ka lympung ki la pyntip ruh ba na ka daw ka jingpynthut jong u slap ïa ka jingïakhun hapdeng ka Mawlai bad Nangkiew Irat dang shen, kumta ki la pynbeit ba katei ka jingïalehkai kan long noh ha ka 18tarik mynta u bnai.
