Khur jingjop ka Them Rangshken, Mawlai SC, Mawreng SC, Sohryngkham SC bad Mylliem

Shillong, Ïaïong 16 : Ka lympung ïalehkai phutbol jong ki heprit kiba hapoh ka shiphew snem kaba la tip kum ka Under-10 (Boys) Football League 2023 ba pynïaid da Shillong Sports Association (SSA) ka dang ïai bteng haduh ka sngi Saitjaiñ ha kaba la ïoh ban pynïalehkai ïa ki shipew tylli ki team.
Ha katei ka sngi ha ka jingïalehkai ha madan Polo, Shillong, ka Them Rangshken A.C.C, Mawlai SC, Mawreng SC, Sohryngkham SC bad Mylliem Grassroot ki la ïoh ban khur ïa la ki jong ki jingjop.
Ka Them Rangskhen A.C.C ka la khur jingjop da kaba pynliem da 9-1 kol pyrshah ïa ka Rangdajied United FC ha ka jingïalehkai kaba nyngkong, ka Mawlai SC ka la pynliem da 2-0 pyrshah ïa ka Madanryting SC ha ka jingïalehkai kaba ar, ka Mawreng SC ka la pynliem kput da 11-0 kol pyrshah ïa ka Summit Academy ha ka jingïalehkai kaba lai.
Ka Sohryngkham SC ka la khur jingjop da kaba pynliem da 2-0 kol pyrshah ïa ka Kick Start FT ha ka jingïalehkai kaba saw bad ha ka jingïalehkai kaba khatduh jong kane ka sngi, ka Mylliem Grassroot ka la khur jingjop da kaba ïoh ban pynliem da 2-0 kol pyrshah ïa ka Mawpat SC.
Haba phai sha ka jingïalehkai kaba nyngkong hapdeng ka Rangdajied United FC bad Them Rangshken A.C.C, dei ka Them Rangskhen kaba la ïoh ban thep kol nyngkong ha ka minit ïalehkai ba dang ïaid san minit lyngba u Manbha Mawlong uba la thep ruh lai kol, katba ka Rangdajied United FC ka la ïoh ban pynphai tang shi kol ha ka minit ba 23 lyngba u F.M Kharkongor.
Kiwei pat kiba la thep kol na bynta ka Them Rangskhen ki kynthup u I. Kharbuli uba ïoh ban thep lai kol (20, 24, 31min), N. Kharphuli (25, 26 min) bad u J. Kharphuli (33min).
Ha ka jingïalehkai kaba ar, ïa ki ar kol na ka bynta ka Mawlai SC la thep da u M. Khongwir (11min) bad u H. Lynrah (49min). Ïa ki 11 kol na ka bynta ka Mawreng SC la thep da u P. Nongbri uba la thep san kol (8,31,40,42,46min), u S. Sohlang u thep saw kol (1,14,18,34min) bad u R. Thabah u thep ar kol (17,50min).
Ha ka jingïalehkai kaba saw, ïa ki ar kol na ka bynta ka Sohryngkham SC la thep marwei da u P. Kharbuki (15,48min) bad ha ka jingïalehkai kaba san bad kaba khatduh jong kane ka sngi, u D. Kharbudnah (13,28min) u la ïoh ban thep marwei ïa ki ar kol na ka bynta ka Mylliem Grassroot ha ka jingïakhun pyrshah ïa ka Mawpat SC.