Shillong, Risaw 27: Ka Mylliem SC bad ka Lawsohtun SC ki la khur jingjop ha ki jingïalehkai ka lympung Division Football League 2024 ba la pynïaid da ka Shillong Sports Association ha SSA Stadium, Polo, ha ka sngi Saitjaiñ (26 tarik Risaw).
Ha kane ka sngi, ka Mylliem SC ka la pynliem noh ïa ka Umphyrnai SC da 2 kol, katba ka Lawsohtun SC ka la jop da 1 kol ïa ka Nongkseh SC.
Haba phai sha ka jingïakhun kaba nyngkong, ka Mylliem ka la ïoh ban lamkhmat naduh ka 4 minit lyngba ka kol jong u Shembhalang Langbnang, bad nangta u Kevin Kurkalang (34min) u la pynkhih ïa ka kol kaba ar khyndiat minit shuwa ban kut ka kylla step.
Watla ym shym la don shuh ba pynkhihjar na baroh arliang, hynrei kitei ki ar kol ka la biang ïa ka Mylliem ban khur pura ïa ki lai point kiba kongsan.
Katba ha ka jingïakhun kaba bud hapdeng ka Lawsohtun bad ka Nongkseh, kumba long ha ka jingïalehkai ba ladep, u Kitboklang Pale (90’+2) u la pynkhih ïa ka kol ha ka khyllipmat shuwa ban kut bad mynta ka kynti ka kol kaba u la thep ka la pynlong ïa ka kynhun ban khur pura ïa ki lai point.
Ha kane ka Lah Sngi U Blei (28 tarik Risaw, 2024), ka Mawkhar SC kan aireng pyrshah ïa ka Mawtawar SC ha ka SSA First Division FL 2024, ha ka por 11:45 baje mynstep, nangta ha ka lympung Shillong Premier League 2024, por 5 shiteng janmiet hapdeng ka Laitkor SC pyrshah ïa ka Sawmer SC.
