Shillong, Rymphang 16: Ka MLP ka la pynliem ïa ka Malki SC da 4 wiket ha ka jingïakhun jong ka lympung Shillong Cricket League First Division 2024-25 ba la pynlong da ka Shillong Cricket Association ha madan Polo, ha ka sngi Saitjaiñ.
Ka jingïalehkai ka la sdang ha kaba ka Malki ka la rai ban tied nyngkong hadien ba jop ïa ka toss, da kaba kamai 118 ron shuwa ban khyllem baroh 10 wiket naki 28.2 ober. U Ronnie MC Donald Nongrum u la kamai 25 ron naki 33 bol, katba u Sylvester Mylliempdah u la tied 25 ron naki 40 bol.
Ha ka liang ki rangkawang bol jong ka MLP u Alvin Bamon u la khur 4/11 naki 4.2 ober, katba u Morningstar Khongwir u la khur 2/10 naki 6 ober.
Wat hadien ba u Deibormi Rangad (8 over: shah tied 31 ron: khur 3 wiket) bad u Sylvester Mylliempdah (8 over: shah tied 21 ron: khur 2 wiket) ki la pyrshang ban lehkai bha ha ka bowling hynrei ka MLP ka la pyndep ban kynjoh ïa ka 119 ron ba ka donkam tang ha ka 30.1 ober, da kaba hap tang 6 ngut ki nongtied.
Sa shisien u Alvin Bamon u la tyngshaiñ biang na bynta ka MLP da kaba kamai 33 ron naki 61 bol ha kaba u la khur syndon ïa ka nam Man of The Match, katba u Johnward u la ïarap 32 ron naki 52 bol.
