Shillong, Rymphang 24 : Ka Cricket Smit bad ka Marbisu CC ki la khur jingjop ha ka lympung ïalehkai kriket 2nd District League T20 Cricket Tournament ba la pynïaid da ka East Khasi Hills Cricket Association (EKHCA) ha ki jingïalehkai ha ka sngi Thohdieng.
Ka Cricket Smit ka la khur jingjop da kaba pynliem ïa ka Lumpaia Avengers CC da 5 ron katba ka Marbisu CC ka la pynliem da 98 ron ïa ka Thangsning CC.
Ha ka jingïalehkai kaba nyngkong, ka Cricket Smit kaba la jop ïa ka jingkynting pisa ka la kam ban tied nyngkong bad kamai 133 duh noh 8 wicket ba haroh ki 20 over, u Elbrenroy Mawthoh u kamai 27 ron na ki 35 bol bad u Banshanlang Nongdhar u kamai 25 ron na ki 21 bol.
U Miquel Obando Nongbri u khur 4 wicket ai kamai 14 ron ha ki 4 over katba u Daryll Donald Nongbri u khur 3 wickt ai kamai 26 ron ha ki 4 over na ka bynta ka Lumpaia Avengers CC.
Ka Lumpaia Avengers CC haba beh ïa katei ka ron kam shym la poi sha ka thong watla ka la pyndep baroh ïa ki 20 over ha kaba kamai tang 128 ron duh noh 8 wicket, u Easterland Iangrat u kamai 35 ron na ki 40 bol bad u Elsabat Nongdhar u khur 3 wicket ai kamai 20 ron ha ki 4 over. Ïa ka nam Player of the Match la ïoh da u Elbrenroy Mawthoh jong ka Cricket Smit.
Ha kawei pat ka jingïalehkai, ka Thangsning CC kaba la jop ïa ka jingkynting pisa ka la ailad tied nyngkong ïa ka Marbisu CC kaba la kamai 123 ron khyllem noh 9 wicket ha baroh ki 20 over ha kaba u Bashemphang Kurbah u kamai 20 ron na ki 24 bol katba u Briketstar Kharumnuid u ïoh 2 wicket ai kamai 18 ron ha ki 4 over.
Haba wan beh ïa katei ka thong, ka Thangsning CC kam shym la lah ban tied pyndep ïa ki 20 over ha kaba ka la khyllem noh 9 wicket bad kamai tang 25 ron ha ki 8.5 over, u Badap Pura Nongkhlaw u kamai 3 ron na ki 8 bol, u Andy Alwin Dkhar u khur 5 wicket ai kamai tang 4 ron ha ki 2 over bad u Richard Collin Diengdoh u ïoh 2 wicket ai kamai 4 ron ha ki 3 over. Ïa ka nam Player Of the Match la ïoh da u Andy Alwin Dkhar.
