Khublei shibun Shillong, ong u Ed Sheeran ba ïohi ïa ka jingieid jingrwai ki paidbah

Shillong, Rymphang 13 : U khlur rwai ba pawnam ha ka pyrthei u Ed Sheeran ha ka janmiet sngi Balang u la pynkhih win ïa ki paid ieid jingrwai jong ka Jylla bad kumjuh ïa kito kiba la wan khnang na kylelng ki bynta jong ka thain shatei lam mihngi ban wan sngap khnang ïa ka ryndang ba syiang jong u.
Ha kane ka concert kaba la pynbit pynbiang da ka AEG Presents Asia bad ka BookMyShow Live, la wan ban sakhi da kumba 26hajar tam ki paid ieid jingrwai. Ka jingieid bad ka jingthrang jong ki ban ïoh sngew ïa ka sur jong u Ed Sheeran ka la paw pyrthei da ka jingmih jong ki ban wan ieng lain naduh mynsngi watla ka concert ka sdang haduh janmiet.
Mar ïa kiew u Ed Sheeran ha rynsan ryngkat ka sopti kaba thoh ‘Shillong’ ki paidbah ki la risa bad pyrta jam ban pdiang sngewbha ïa u.
“Kumno Shillong phi long? Khublei shibun ba phi la wan shane. Kadei ka sien kaba nyngkong eh ïanga ba ngan poi shane. Nga kmen haduh katta katta ban don mynta hangne,” u la ong.
Da kaba sdang shwa da ka jingrwai ‘ Castle on the Hills’ ki paidbah ki la khih puk bad sdang ban ïa rwai lang naduh ba sdang haduh ba kut.
Ha shwa ba rwai ïa ka jingrwai ‘The A Team’ u Ed Sheeran u la ïathuh ba ïa katei ka jingrwai u la thoh ha ka por ba u dang don 18 snem ka rta da ka jingngeit ba kane ka jingrwai kan pynkylla lut nadong shadong. U ong ruh ba um lah ban mutdur ba hadien 15 snem un lah ban poi sha ki jaka bapher bapher bad ban tem hakhmat ki paidbah kumba long ha Shillong.
Kiwei ki jingrwai kum ka ‘Shivers, “I Am a Mess’ nangta ka jingrwai ‘Photograph’ bad ka ‘Happier’ ka la pynshongshit haduh katta katta ïa u paidbah ba bun.
Tangba na kine ki jingrwai baroh, ka madan Polo ka sawa jam kynsan mar rwai ïa ka jingrwai ‘ Perfect’ ha kaba ka sur u paidbah ka la kham jam ban ïa u Ed Sheeran haduh ba un da pynbna hadien ba kadei ka sien kaba nyngkong eh ïa u ban sakhi ba ki paidbah ki lah ban pynsawa jam haduh kattei kattei ïa ka sur kaba pyni ba ki lah lyndet lut ruh ïa baroh ki kyntien jong ki jingrwai.
Katba nang ïaid ka miet, katta ruh u paidbah u nang shongshit bad khamtam haba u la tem ïa ki jingrwai kum ka ou Need Me, I Don’t Need You’ and ‘Shape of You’, ïa kane ka rynsan la pynwai noh da ka jingrwai ‘Bad Habits’
Kane kadei ka nongbah kaba hynriew na bynta u Ed Sheeran ban rwai ha India hadien ka Pune, Hyderabad Chennai bad Bengaluru shwa ban wan sha Shillong.