Nongstoiñ, Nailar, 17: Ka West Khasi Hills ka la ai khublei khatduh ïa u In-Charge Deputy Commissioner u ban sa leit transfer bad promotion noh jong ka West Khasi Hills District, bah PD Sangma. Ïa ka farewell programme la pynlong da ki Ophisar bad nongtrei jong ka DC office mynta ka sngi ha Trysem Hall DC’s office, Nongstoiñ.
Ha kane ka farewell, u bah PD Sangma haba ai jingkren khublei khatduh, u la ïaroh palat ïa ka jinglong la kloi jong ki officer bad baroh ki nongtrei jong ka DC ophis, kiba la ai jingkyrshan bad ïatreilang barabor bad u ban pyntyllun ïa ka kam jong u, ïa kaba la bynshet ha u ha kine ki 10 snem ba la leit kum u ADC bad In-Charge DC ka District. U la ïathuh ruh ba u la mad shibun ki jingmyntoi ha ka kam ha kine ki 10 snem ba u la shakri bad trei ha West Khasi Hills.
U la kyntu ïa baroh ki nongtrei jong ka DC ophis ba kin long kiba minot ha ka kam kaba la bynshet ha ki, ban trei hok bad aiti lut na ka bynta ka bha ka miat jong ki nongshong shnong jong ka District. Kum ban shu pynkynmaw ïa u bah PD Sangma la kyntiew kyrdan bad pynkynriah noh ha Shillong bad la thung ïa u kum u Joint Secretary kaTextile Department. Ki Officer bad nongtrei ki la pynkup burom ïa u In-Charge DC da ka jingai sngewbha ba la ai da ka kong D Sun, Nazir DC ophis.
Ha kane ka programme la pynïaid da u bah H.K Thabah ADC, kiwei kiba la ai jingkren ki long kong PTD Sangma EAC, Treasury Officer bah J.L Gashnga, bah S Khongjee Superintendent Excise, Superintendent Supply bah P.K Snaitang, DPM Basin Development Unit bah R Majaw nalor kiwei kiwei.
