Khrui leit jurip lang ki RS ka Upper Shillong bad u Bah Hamlet ïa ka tyllong Umpaitmaw
Ba ïoh ïa ka projek umbam ba 11.52 klur
Shillong, Ïaiong 02 : Ki Rangbah Shnong na ki phra tylli ki Dorbar Shnong ha ka sngi Nyngkong ryngkat bad u Chief adviser jong u Myntri Rangbah Bah Hamlet Dohling ba dei ruh u MLA barim ka thain ki la leit ban jurip lang ïa ka tyllong um ha Umpaitmaw na ka bynta ban pynkhlain shuh shuh shuh ïa ka tyllong um ban bsa ïa ka Sanmer, Sawmer, Lumpdeng bad ka Lummawbah nalor ïa kiwei ki shnong ha ka thain Upper Shillong.
Ha kane ka jingjurip la donlang ruh u Executive Engineer ka tnad PHE nalor kiwei ki ophisar jong ka tnad.
Haba kren bad ki lad pathai khubor, u Rangbah Shnong ka Mawklot Bah Mawkordor Nongneng u la iathuh ba lyngba kane ka skim kaba long 11.52 klur tyngka kan long ka jingkyrkhu ym tang ïa ki saw shnong hynrei ïa kiwei ruh ki shnong ka Upper Shillong.
Shuh shuh u la ong ba kum ki Rangbah Shnong ki pynpaw ka jingsngewnguh ïa u Bah Hamlet uba la buddien bad pynïoh ïa kane ka skim haduh ba kan da urlong na ka bynta ban weng ïa ka jingkyrduh um ha ka thain.
Na ka liang u Bah Hamlet pat u la ïathuh ba dei ha u snem 2022 ki la wan ban jurip lang ïa katei ka jaka ha Umpaitmaw ryngkat bad ki nongïalam shnong bad hadien ba ki la wan jurip ki la phah ka jingtyrwa sha ka sorkar khnang ba ki shnong ha ka thain kin ïoh kham pahuh ka umbam umdih.
U la ong ruh ba dei hadien ka jingïai buddien kaba khlem shongthait ryngkat ryngkat bad ki nongïalam shnong ki la ïoh ïa ka mang tyngka kaba long 11.52 klur tyngka na ka bynta ban shna ïa kane ka projek pynlang um.
Katkum ka jingong jong u, shen hi kin sa pyntrei noh ïa kane ka projek kaban long ka jingkyrkhu kaba khraw ïa ki shnong kiban myntoi na kane ka tyllong um.
U ong ruh ba lyngba kane ka skim kan ïarap ïa ka skim JJM ban pynpoi noh ïa ka um ha ki iing ki sem kiba don ha kane ka thain hadien ba ïa ki pipe la dep ban pynpoi lut.
Hadien kane ki nongïalam snong ryngkat ki ophisar ka tnat bad kumjuh u Bah Hamlet ki la leit ruh ban jurip ïa ki tyllong um jong ki shnong kiba don marjan bad katei ka jaka.