Khring u shynrai Lakadong ïa ki paidbah ha ka National Exabition ba la pynlong ha ka nongbah Chennai kum u Golden Spice

Khliehriat Jymmang 26: U bah Damewanhi.L.Rymbai, uba dei u Chairman jong ka Moolamylliang Biodiversity Management Committee, East Jaiñtia Hills District, lem bad u bah Tngshaiñlang Dewkhaid, uba dei u Joint Secretary jong ka Phlangwanbroi BMC (East Khasi Hills District), ki la leit ban ïa shimbynta ha ka ïew pyni nam kaba dei ruh ka National Exabition kaba la pynlong myn ha ka 22 tarik mynta u bnai ha ka nongbah Chennai – Tamil Nadu ba ong ba u shynrai Lakadong u dei uwei na ki jait mar rep uba la khring bha ia ki paidbah kiba la wan sha katei ka iew pyni nam.
Shuh shuh, u bah Damewanhi Rymbai, u la iathuh ruh ba nalor u shynrai Lakadong, u la leit rah ruh ia kiwei kiwei ruh ki jait mar rep kum u sying makhir, u sying blei, sying met, ka shriew, u kwai, tympew, ki soh shang, ki soh my it, sohmarit khlaw, ki phlang dait bniat, phan karo bad kiwei kiwei.
Ha kane ka iew pyni nam, u bah Damewanhi, u la pyni nam ruh ia ki jait syntiew khlaw kiba la jan duh jait kiba ju khot ki ‘Wild Orchid’.
U Myntri jong ka sorkar pdeng, uba dei peit ia ka Environment Forest and Climate Change, u Bhupender Yadav u la long kum u kongsan uba la wan ban plie ia kane ka jingrakhe ia ka International Day of Biological Diversity ba la pynlong ha ka jylla Tami Naduh myn ha katei ka 22 tarik mynta u bnai, kiba la ia don ryngkat lang ha katei ka jingrakhe ha Chennai, ki kynthup ruh u myntri ka sorkar pdeng, u Ashwini Kumar Chobey, ka Secretary jong ka MoEFCC, ka Leena Nandan, u Addl Secy MoEFCC Shri Naresh Pal Gangwar, ka adviser jong ka MoEFCC, ka Dr Rita Khanna,, ka Addl Chief Secretary jong ka sorkar Tamil Nadu , ka Supriya Sahuh, u myntri jong ka Enviro-nement and climate change, Youth Welfare and soprt developmet, Tamil Nadu, u Siva.V. Meyyanathan bad kiwei kiwei.
Kum ban shu kynthoh, ia ka Moolamylliang Biodiversity Management Committtee, East jaintia Hills District, la saindur ha u snem 2016 bad ka la don ka jingkiew stet jong kane Management Committee, ka dei ruh kaba la ioh khur shibun ki khusnam ha kaba iadei bad ki kam pynneh mariang bad ka dei kawei kaba la paw khmat bha ha ka jylla Meghalaya, lah ban ong ruh ba ka jingkiew kane ka MBMC ka dei ruh namar ka jingaiteilang bad ka Dorbar Shnong Moolamylliang ba la lam khmat da u Waheh Shnong, u bah Apmon Pashiang bad ruh ka jingiashim bynta shitrhem ki nongshong shnong kiba don ka myniem bad pynneh pynsah ïa ka mariang bad ïa ki jingthung jingtep kiba ju pynkup rong jyrngam ïa ka mariang bad kane ka shnong Moolamylliang ka dei ruh ka shnong kaba khuid tam ha ri lum Jaiñtia.