Shillong, Naiwieng 17 : Ka National Peoples Party ka la pynkhreh shaid shaid mynta ban pynbna noh ïa ki kyrtong kiban aireng ha kane ka elekshon MDC la ka long ha ki constituency jong ka KHADC kumjuh ruh ha JHADC watla na ka tnad Elekshon kam pat pynbna lano ka elekshon kan long.
Haba kren bad u Working President jong ka NPP, Bah Hamlet Dohling u la ïathuh ba mynta ka party ka la ïaid ha man ki block bad ki constituency ban pynkhreh na bynta kane ka elekshon
“La kumno kumno ha ka taiew ba nyngkong jong u bnai ban wan ngi khmih lynti ba ngin lah ban pyllait noh ïa ka thup kyrteng ba nyngkong jong ki kyrtong ki ban aireng ha ka elekshon MDC ha KHADC bad kumjuh ha ka JHADC,” u la ong.
Shuh shuh u la ong ruh ba na ka liang ka party kan peit ruh ba ki kyrtong ba ka party kan sei kin dei kiba don ka jingïadei bad ki paidbah khnang ba kan pynsuk ïa ki ban poi sha ka thong.
U la ïathuh ruh ba ïa mynta hi ka Election Committee ka dang bishar bniah haba ïadei bad ki kyrtong khamtam ha kito ki jaka ba don bun ki kyrtong kiba pan tiket.
“Na ka liang ka party ngim pat rai la ngin buh kyrtong ha baroh ki constituency hynrei kaba hakhmat hi ka long ba ngi kwah ba ki kyrtong kin dei kiba don ka jingïadei bad u paidbah, kiba shemphang bad ki kyrtong kiba don ka jingkitkhlieh,” u la ong da kaba bynrap ba kum ka party hi ki kwah lada ban buh kyrtong ha baroh ki constituency lada ki ïoh ïa ki kyrtong kiba biang.
Lah ban kdew hangne ba jan baroh ki party kiba pynkhreh na bynta kane ka elekshon MDC ki la sdang ban khih khohreh ban pynbna ïa ki kyrtong.
Dang shen na ka liang ka Voice of the People Party (VPP) ka la dep ban pynbna ïa ka thup kaba nyngkong katba na ka liang ka UDP pat ka la pynbna ba kin sa pyllait noh ïa ka thup ki kyrtong ha ka 06tarik jong u Nohprah kaba dei ka General Council jong ki.
Ha kajuh ka por kiwei pat ki party ki dang wer ïa ki kyrtong kiba kwah ban aireng ha kane ka elekshon ba kin thep kyrteng.
Lada phai sha ka NPP, baroh ki MDC ki pynkhreh ban ïakhun biang bad na kajuh ka constituency lait noh tang u CEM ba mynta, Bah Pynïaid Sing Syiem u ba pynkhreh ban ïakhun na Nongthymmai.
