Shillong, K’ Lyngkot 14: Ka Lympung Lum Kur Dhar (LLKD), Jaiñtia Hills ka khot sngewbha ïa baroh ki Kur kiba don ha ri Lum Jaiñtia bad na shabar u pud, kum na Khasi Hills, na Assam bad na Bangladesh bad na kiwei de ki jaka ba kin sngewbha ban ïawan sha kane ka Dorbar Kur (Annual General Meeting) 2025.
Ïa kane ka Dorbar jong ka Kur Dhar yn pynlong ha ka shnong Mulieh, West Jaiñtia Hills kaba hab hapoh ka Laskeiñ C&RD Block ha ka 18/01/2025 naduh ka por 10:00 baje mynstep. Ha kane ka Dorbar Kur yn ïadon bynta lang u ma Sniawbhalang Dhar, uba dei u Deputy Chief Minister ka sorkar Jylla kum u Kongsan (Chief Guest), ha ka jingïadon ryngkat kiwei de ki rangbah jong ka Kur na ka Central Body, Jowai bad Shillong.
Ka shnong Mulieh ka jngai kumba 29 Km tam na nongbah Jowai haba leit lyngba ka shnong Mookyndeng.
Ki lynti ban poi sha ka shnong Mulieh ki don lai tylli. Kawei lada ïaid na Lad Pasyih bad poi sha shnong Kyndongtuber-Pammanik-Mulieh. Kawei lah ban ïaid na shnong Shangpung Khliehmuchut da kaba phai sha ka liang ka diang bad shwa ban poi shnong Pammanik don ka lad ban phai sha ka liang ka mon ban poi sha Mulieh.
Kawei pat kadei kaba ïaid lyngba ka shnong Raliang-Mookyndeng bad phai sha ka liang ka diang ban poi sha Mulieh. Kane ka long katkum ka jingpyllait khubor na u Publicity Secretary ka kur u ma Subas Dhar.
