Khot ka Synjuk ki Rangbah Kur ka Bri u Hynñiewtrep sha ka jingïalang paidbah ha Mawkyrwat

Mawkyrwat, ‘Nailar 21: Ka Synjuk ki Rangbah Kur jong ka Bri Hynñiewtrep (SRKBH) jong ka South West Khasi Hills District kan sa pynlong ïa ka jingïalang paidbah ha ka 26 tarik u u ‘Nailar, 2023 ha Mawkyrwat, South West Khasi Hills District.
Kane ka jingïalang paidbah ka dei kum shibynta jong ka jingsngewkitkhlieh ha kaba ïa dei ban pynneh pynsah ïa ki riti ki dustur ba u khasi u don la ka jong ka riti ka dustur jong ki kur bapher bapher bad ha shibun kiwei de bynta kiba kongsan tam na ka bynta ki jingbha bad ki jingskhem ha ki dustur longtrai kiba don hapoh ka South West Khasi Hills District.
Namarkata, u bah Manstudy Nongrem kum u Adhok President, u bah B. Ionanis Shylla, General Secretary bad bah M. Dapbor Jyrwa ha ryngkat bad kiwei de ki dkhot jong ka Synjuk ki Rangbah Kur ka Bri u Hynñiewtrep, South West Khasi Hills District ki la ïa wer ïa baroh ki jait kur khlem da jer kyrteng kiba don hapoh ka distrik ba kin ïa wan khnang ha katei ka sngi ha Women’s Hostel jong ka Sngap Syiem College, Mawkyrwat na ka bynta kumno ban ïa pyrkhat ha kaba ïa dei bad ka imlang sah lang kumno ban pynneh pynsah ïa ki riti dustur bad khamtam kumno ban teh lakam ban lah ban khang lad na kiwei pat ki jaid bynriew.
Kane ka Synjuk ki Rangbah Kur ka Bri u Hynñiewtrep kam shem la ïa don bynta ei ei bad ki kam politik ne bad kino kino ki sengbhalang ba kane ka Synjuk ka dei na ka bynta ban tehsong ïa baroh ki jait kur ha kiba bun ki bynta.
Namarkata, ki buh ka jingkyrpad ïa baroh ki rangbah kur ba ki dei ban wan mihkhmat ar ngut khnang ban tip khamshai ïa ki mat trei kam ba kan long kaba sei soh.