Khot ka Chief Justice ïa ki samla pule ban tei ïa ka kam jong ki halor ka jingtrei shitom

SHILLONG, Naitung 8: Ka National Law University Meghalaya ka la rakhe ïa ka sngi sdang kaba 3 jong ka ha ka sngi Balang ha kaba ka Chief Justice ka Revati Mohite Dere ka la khot ïa ki samla pule ban tei ïa ka kam jong ki halor ka jingtrei shitom, ka jingpynpaw pyrthei, bad ka jingsngew ban shakri.
Kum ka Chancellor jong ka University bad ka Chief Justice jong ka Meghalaya High Court, ka Mohite Dere ka la plie ïa ka Moot Court Room ba thymmai jong kane ka jaka pule bad ka la ïalam ïa ka jingthung dieng ha shwa ban ai jingkren sha ki samla pule ha Dr APJ Abdul Kalam Auditorium.
Ha ka jingkren kyrpang jong ka, ka la buh ïa ka jingpule aiñ kum ka jingkular kaba ïai bteng ban ïa ka kyrdan pule kaba dei ban pyndep.
“Ym don ba lah ban bujli ïa ka jingtrei shitom, ka jingminot, bad ka jingpynbha ïalade kaba ïai bteng ha ka kam aiñ,” ka la ong, da kaba kyntu ïa ki samla pule ban khein ïa ka jingpule kum ka jingtrei kaba neh ha ka jingim.
Ka Mohite Dere ka la ban jur ïa ka jingdonkam ban mih shabar jong ki kamra klas ban sngewthuh kumno ka aiñ ka treikam ha ka jingim ba shisha.
Shuh shuh ka la pynshlur ïa ki samla pule ban leit leh intern bad ki district court lawyers, ki nongmudui paidbah ne public prosecutors, ki nongïasaid aiñ bad ki seng treimon sngewbha ban iohi ïa ka rukom bishar hok.
“Kane kan ïarap ïa phi ban pynroi ïa ka jingsngewthuh kaba kham jylliew shaphang ka rukom ai hok bad ki jingshisha ha ka kyrdan ba shapoh,” ka la kdew, da kaba bynrap ba ki nongïasaid aiñ ha ka lawei ki dei ban ïakynduh ïa ka kam da ka “jinglong ba janai, ka jingaiti lut, bad ka jingaiti ban shakri ïa ka imlang sahlang,” katba ki dang plie ïa ki jingïohi bapher bapher.
La plie ïa ka prokram jong kane ka sngi da ka jingkren ai khublei na ka Vice-Chancellor (In-charge) ka Kerpa Meida Lyngdoh Nongbri.
Ka skulbah ka la pyni ruh ïa ka phlim lyngkot halor ka jingiaid lynti jong ka haduh mynta, kaba la pynpaw ïa ki prokram pule ne academic programmes bad ka jingroi jong ki jaka pule.U Assistant Director of Sports u Bah Rishan Veban Diengdoh u la pyni ïa ka rukom pyntreikam thymmai jong ka Student House System, ïa kaba la plie paidbah da ka Chancellor.
U Registrar Prof (Dr) Baharul Islam u la ai ïa ka jingai khublei kaba la pynkut noh ïa ka jingrakhe.