Shillong, Nailur: Ka North East India Mission Association (NEIMA) ha u kyrwoh lyngba u Bah DB Ryntathiang Secretary NEIMA Building Committee da kane ka pyntip ba kin pynlong ïa ka “Gospel Musical Evening cum Food Fest,” ha ka 6 tarik u Risaw 2022 hapoh Dorbar Hall cum Indoor Stadium, Mission Compound Shillong.
Ka jingthmu ha kaba pynlong ïa kane ka prokram ka long na ka bynta ban pynmih pisa (Fund) na ka bynta ka jingtei ïa ka ‘Multi Purpose Project cum Rehab Centre’ jong ka NEIMA kaba don hapoh Mawlai Mawiong Rim, kaba ka jingpyntrei mynta ka dang ïaid shakhmat.
Kane ka projek kaba dang tei mynta ka long na ka bynta ban ïarap ne pyllait ïa ki briew kiba la hap ha ki jingmlien ba sniew kum ha ka kyiad, u drokbad kiwei kiwei pat ki jait jingdih pynbuaid kiba la wanrah ka jinghiar dor ha ki longïing longsem bad ha ka imlang sahlang.
ïa kane ka prokram yn pynlong ha ki ar bynta, kata ka ‘Food Fest’ naduh ka por 11 baje mynstep ter ter, bad ïa ka ‘Gospel Musical Evening’ yn pynlong naduh ka por 3 baje janmiet haduh 8 baje mynmiet.
Kumta na ka liang ka NEIMA ka wer bad khot sngewbha ïa baroh sha kane ka ‘Gospel Musical Evening cum Food Fest’ bad ïa ki Donor’s Card lah ruh ban ïoh ha katei ka sngi, lane ki lah ruh ban wan mih ha ka ophis jong ka NEIMA ha Mawkhar, Shillong.
