Nongpoh, Lber 20: Ki nongïalam ka HYC Raidthadrang Circle hapoh ka jingïalam u samla Pyndap Masharing General Secretary HYC Raidthadrang Circle haka jingsynran lang u Samla Shemphang Mahsaring Secretary ka HYC Ri Bhoi lem bad ki dkhot, mynta ka sngi kila lap bad pynpaw pyrthei ïa ka jingleh torti u kontraktor ba pyntrei ïa ka surok PMGSY na Kyrdem sha Khyndewso khlem da siang bha bad lah ruh ban sakhi lyngba ki video haka jingleit jurip jong ka seng ba ïa ka rong ba la dep siang lah ban shu khoh da ka kti.
Kitei ki nongïalam kila pynpaw ruh ka jingsngewkhia halor ka jingleh torti jong u kontraktor ba pyntrei ïa utei u surok ba la shu siang tang dep bad torti namar ïa ka rong ba la dep siang lah ban shu khoh tang da ka kti namar kam bit bad kam skhem eiei bad katno katei ka surok kan neh bad dawa ruh na ka tnad PWD ba ka dei ban shimkhia mardor bad ban bthah ruh ïa u kontraktor ba u dei ban shimkhia ban lehbha haba trei ïa ka kam na ka bynta ka jingmyntoi ki paidbah.
Ki la ong ruh, ha ka jingshisha ka jingwan poi kane ka kam pynroi sha kane ka thaiñ ka dei ka jingmyntoi kaba khraw na ka bynta ki paidbah khamtam u surok uba long kum u budlum jong ka roi ka par, hynrei ïa une u surok ba la siang rong ha kitei ki jaka la shul eh tangdep bad siang torti namar lah ruh ban khlong da ka kti.
Kitei ki nongïalam ki la pynpaw ïa ka jingsngewkhia halor ka jingpyntrei ïa une u surok bad ki la kyntu jur ruh ïa ka tnad PWD kaba dei peit ba kan shimkhia mardor ïa kane ka jingpyntrei torti da u kontraktor bad ha kajuh kapor ban maham ruh ïu kontraktor ba u dei ban shna pynbha ïa utei u surok katkum ba la pynmang bad ban lehbha biang na ka bynta ka jingmyntoi bad ka jingbit jingbiang jong ki paidbah.
