Shillong, Jylliew 23: U Myntri Rangbah ka jylla u Conrad K Sangma u la leit jngoh ïa ka Safal outlet kaba ha New Delhi, kaba dei ka jaka die khutia jong ka Mother Dairy Fruit and Vegetable Pvt. Ltd. Kane ka jingleit jngoh kadei ka jingpyrshang kaba kongsan ban kyntiew ïa ki jingmih na ki marrep jong ka jylla.
U Sohtrun ba la thung ha Meghalaya la tip kum uwei na ki jait soh u ba thiang uba don ka dor jong ka Brix kaba 16 haduh 18+, u dei u jaitsoh uba kyrpang jong ka Meghalaya. Hadien ba u la soh bha u long uba bang bha ban bam da kaba don ka acid kaba duna bha kumba 0.6-1.2%. Ïa kine ki soh la shalan ha ka ri bad kumjuh ruh sha ki ïew kiba shabar ri. Ban pynsuk ban ïoh ïa une u soh la buh ïa ka IQF (Individual Quick Freezing) da ka Umdihar cooperative society, kaba la pynmih ïa kumba palat 250 MT u Sohtrun, da ka jingthmu ruh ban pynmih shuh khambun sa palat 600 MT ha une u snem, ha baroh ki thaiñ Khasi bad Garo Hills.
Ha kane ka jingleit jngoh u Myntri Rangbah la pdiang burom da u Manish Bandlish, u Managing Director jong ka Mother Dairy Fruit and Vegetable Pvt. Ltd.
U Sangma u la kynthoh da kaba ong, “Ka Meghalaya ka la pynmih shibun ki Sohtrun bad kumjuh kiwei ruh ki jait soh. Hynrei ka jingïaleh ka dei hi ha ka ïew ka hat ban ka jingpynïasoh ïa ki bad kiwei pat ki nongthied. Namar kata ka sorkar Meghalaya ka la shim bun ki sienjam ha kine ki lai snem, kaba kynthup ïa ka jingpynlong ïa ki prokram kum ka Pineapple Festival kaba la pynlong ha Delhi ha u snem ba la leit, kaba yn pynlong biang ha une u snem ba mynta.
Ka Safal ka la pynmih ïa ki Sohtrun ba la pynmih da ka Muktidata Multipurpose Cooperative Society ha Tikrikilla, West Garo Hills. Halor kane ki nongthied ki la pynpaw ïa ka jingkynthoh kaba bha halor ka jinglong bad ka jingmad jong u Sohtrun ka Meghalaya.
Ka sorkar kan bteng ban pynsuk ïa ki nongrep bad ïa ki cooperative na kiwei ki thaiñ jong ka Meghalaya ban pynmih ïa ka dor kaba kham bha bad ban pynthikna ba ka jingdon u soh hapoh ka nongbah Delhi ka dei ban biang.
