Khmih lynti ba ki jingeh ban pyntreikam ïa ka Leshka Hydro Project Stage-II kin kut mynta u snem: Mondal

Shillong, Naitung 03: Ka Leshka Hydro Power Project stage-II, kaba dei ka 210 MW Run-of-the-River (ROR) project, la khmih lynti ba kan lait noh na ki jingeh ba ïakynduh mynta u snem, ïathuh u Myntri ka tnat Bording ka sorkar jylla u A T Mondal.
Kane ka project ka la pyndep ïa 11 tylli na ki 12 tylli ki lynnong (chapter), ba kynthup ïa ka environment bad ka forest clearance, kiba donkam ban pyntreikam ïa ka project.
U Myntri u la ong ba ki lynnong kiba dang sah ki long kiba kham eh bad kiba kongsan bha bad kiba hap ban ïakhun, hynrei u la pynpaw ka jingkyrmen ba kine baroh kin sa lait ha shwa ban kut jong une u snem.
“Ngi dang hap ban pynlait sa ïa kawei ka jingkhang ïit. Kane ka dei kaba eh bha bad ka jingkhang ïit kaba shalak bha. Kyrmen ba ha une u snem ngin sa lah ban pynlait ïa kane ruh ka jingkhang ïit,” ïathuh u Mondal sha ki lad pathai khubor.
Shisien ba la ïoh lut baroh ki clearance, ynsa lah ban pynïaid ïa kane ka kam shakhmat, da ka jingmang tyngka kaba lut kumba T. 2100 klur, kaba dei ka projek bording kaba heh bha ha ka jylla kumba long haduh mynta, u la bynrap.
Haba kylli, u Myntri u la pyntip ba ka kyrdan ka jinglong acid jong ka wah Myntdu ka la khambha, ha kaba kan long kaba lah ban pyntreikam ïa kane ka project.