Khlem wan rung u nongïalam ka Awami League sha Meghalaya dei ka khubor ba ïalam bakla ong ki BSF
Shillong, Nailar 26 : Ki bor pahara khappud ka India ki Border Security Force (BSF) ki la ïathuh ba shilynter ki bynta khappud ka India ba jrong 443 Km bad ka Meghalaya la pynkhlaiñ pahara bha bad ym don satia mano mano ruh ban ïoh rung beaiñ sha India lyngba kine ki bynta khappud da ki nong Bangladesh bad uta u nongïalam ka Awami League u Ishak Ali Khan Panna ruh u khlem ïoh rung bad khlem iap hapoh u pud u sam ka India.
Ki BSF ki la pynshai ba ka jingmih khubor ha ki khubor ka Bangladesh ba u Ishak Ali Khan u iap ha ki bynta khappud ka India namar ba u ïoh jingshitom klong snam ( hearth attack) katba u dang rung sha India na ki bynta khappud ka Dawki ( Meghalaya) namar u phet rieh na la ka ri. Hooid ka Dawki ka dei mar khappud bad ka Bangladesh hynrei utei um sym la ïoh rung shapoh India. “ Ym don mano mano ruh na ki nong Bangladesh ban ïoh rung shapoh India lyngba ki bynta khappud ba dei ban pahara da ki bor pahara Meghalaya Frontier BSF. Ka jingmih khubor ba u Panna u iap hapoh u pud u sam ka India ka long kaba ïalam bakla. Namar lada don kano kano ka jingpyrshang ban ïoh wan rung beaiñ shapoh ka ri ki BSF kin ym map satia. Ki BSF ki la pynkhlaiñ ïa ka jingpahara ha khappud naduh ka 5 tarik u Nailar 2024 mar ïa jia ka jingïa umsnam kaba jur ha Bangladesh bad wat la ki don kiba pyrshang ban wan rung beaiñ la ïoh ban bat bad pynphai kylla ïa ki sha Bangladesh ne aiti ha ki bor pulit ban leh ïa kaba donkam” ong u nongpathai khubor ki BSF.
Na ka liang ki BSF ki la ïakren ruh bad u Assistant High Commission ka Bangladesh ha Assam halor kane ka jingmih khubor bad na ka liang ka ophis jongka Assistant High Commission jongka Bangladesh ki la pynshisha ba kim pat ïoh khubor ei ei halor ka jingiap jong u Panna hajan khappud.
Ka tyllong khubor ka ïathuh ba u Panna u iap hapoh u pud u sam ka Bangladesh kaba jngai kumba 400 metres na khappud bad la suba ba u Panna u la shah pyniap katba u dang ïaid lynti bad ki paralok jongu ha ki bynta khappud ka Bangladesh.