Shillong, Nailar 08 : U National Executive Member ka BJP ba dei ruh u MLA ka Pynthorumkhrah, Bah AL Hek ha ka sngi Nyngkong u la ong ba um ïohi ba kan don ka jingsma politik halor ka jingshah kem u vice president jong ka BJP, u Bernard N Marak halor ka jingkynnoh ba u pynïaid ïa ka ktem awria ha ka farmhouse jong u kaba don ha West Garo Hills District.
“Ka jingtohkit halor kane ka kam ka dang ïaid shakhmat kumta ailad ïa ka aiñ kan pyndep la ka kam,” ong u Bah AL Hek haba kren bad ki lad pathai khubor.
Nalorkata, utei u heh BJP u la ong ruh ba ïa mynta ka jingtohkit ka dang ïaid shakhmat kumta kim kwah ban ong ei ei.
Lah ba kdew hangne ba ïa u Bernard la kem noh da ki pulit na Uttar Pradesh hadien ba ki pulit ka West Garo Hills ki la leit ban khynra ïa ka ktem kaba don ha ka farmhouse jong u kaba la poi haduh u pud ba la kem bun ngut bha ki paidbah bad ïoh pyllait ruh ïa ki san ngut ki khynnah nalor ka jingïoh kurup ïa ki jingdih pynbuaid bad kiwei kiwei.
Shwa kane, u Bernard u la kyntait ba u pynïaid ïa ka ktem awria ha ka farmhouse jong u kaba tip kum ka Rimpu Bagan bad u la kynnoh ruh ba katei ka jingkhynra kadei namar ki ïohi ba ka BJP ka la nang ïohbor ha rilum Garo. Nalorkata u la kam ruh ba kawei kadei ruh namar u dei ka jingma kaba khraw ïa u Myntri Rangbah ba mynta ha ka elekshon MLA kaban long ha u 2023.
Ha kane ka sngi na ka liang u Bah Hek u la pynrem halor ak jingpyndik ïa ki nongtrei jong ka party ha ki bor pulit.
“Khlem pep ngi dawa ïa ka jingtohkit ba laitluid hynrei kawei kaba ngim sngewtynnad kadei ka jingpyndik ïa ki nongtrei party jongngi ha Tura Police Station,” u la ong.
Da kaba kyntait pat ba katei ka ishu kan ktah ïa ka jingïadei hapdeng ka NPP bad BJP, u Bah Hek u la ong, ba kitei ki ar tylli ki party kin ïai bteng ban ïa treilang ha ka MDA.
“Ngi donlang hynrei haba la poi pat ban leit sha ki paidbah shwa ka elekshon ngi donla ki jong ki mat ïakhun elekshon bad hangne ngin ïakhun pyrshah iwei ïa iwei pat halor ki nongrim ba ngi don,” la bynrap biang u Bah Hek.
