Khlem poi ka kynhun u Myntri Rangbah ha ka jingïatai kam pud ka HYC

Nongpoh, Nailar 30: Ka jingthmu ka HYC Sengkmie ban pynlong ïa ka jingïatai nia halor ka kam pynbeit pud pynbeit sam ha Patharkhmah mynta ka sngi ka la hap ban pynsangeh noh bad ka daw ka long ba ka kynhun u Myntri Rangbah bad ki dkhot ka Regional Committee ba la khot da ka seng HYC sha kane ka jingïatai ñia kim shem la wan shim bynta satia.
Ka seng HYC ka la shim ïa kane ka sienjam ban pynlong ïa ka jingïatai halor ka kam pynbeit pud pynbeit sam ba la dep ruh ban soi ïa ka MOU da u Myntri Rangbah ka jylla, u Conrad K. Sangma bad u Myntri rangbah ka Assam, u Himanta Bishwas Sharma, ka dei halor ka nongrim ba ha kane ka wat kaba nyngkong ki paidbah ka thaiñ khappud kim hun satia ïa kane ka jingïasoh ïa ka MOU, na ka daw ba ki la kynnoh ba bun ki jaka ka Meghalaya ki la leit sha ka jylla Assam.
Ka seng HYC wat la kam lah ba pynlong ïa ka jingïatai halor ki kam pud ki kam sam, hynrei ha kane ka sngi ki la pynlong ïa ka jingïaid paidbah ba la shim bynta naduh ki nongïalam ka HYC, ki nongshong shnong na khappud bad ki nongïalam shnong ba ki la pynrem jur ïa ka sorkar MDA ha ka jingïalam u Conrad K. Sangma ba kim hun satia ïa kane ka kam pynbeit pud pynbeit sam da kaba kynnoh ba u Myntri Rangbah ka jylla u la lilam ïa ki jaka ka Meghalaya sha ka Assam khlem da sngap ïa ka sur jong ki paidbah ha ki shnong khappud.
Kane ka jingïaid paidbah ka la sdang na Madan Patharkhmah bad pynkut ha Iew Patharkhmah bad ha kane ka jingïaid paidbah ki la rah ïa ki placard bad ki banner ryngkat ki jingtoh ba pynrem halor kane ka kam pynbeit pud ba ki paidbah kim hun satia na ka daw ba wat ki jaka ba la ti[ shai ba ki dei ki jaka ka Meghalaya la pynhap noh sha Assam bad kane ka paw shai ba ki trai jaka, ki trai muluk bad ki nongïalam Raid nongïalam hima kim don jingtip satia ha kaba ïa ka rai la shim beit da u myntri rangbah ka jylla.
Ki nongïalam ka HYC kiba la shim bynta ha kane ka jingïaid paidbah ban pynrem halor ka kam pynbeit pud pynbeit sam ki kynthup naduh u President ba rangbah ka HYC, u Bah Robertjune Kharjarin, ki vice president ba kynthup ïa u Bah Donboklang Kharlyngdoh bad u Bah Rhembor Saibon, u General Secretary, u Bah Roikupar Synrem, u President ka HYC, Ri Bhoi, u Bah Jason Lennox Nongrum bad kynthup kiwei kiwei ki nongïalam ka HYC bad ki nongïalam Shnong na ka thaiñ Ri Bhoi Sepngi.
Haba kren ruh ha kane ka sngi, kitei ki nongïalam ka HYC ki la pynrem jur ïa u Myntri rangbah ka jylla, u Conrad K. Sangma bad ki la kynthoh ruh ba u la soi matlah ïa ka MoU khlem da don ka jingtip lang ki trai jaka, ki nongsynshar Raid bad Hima bad wat kito ki nongshong shnong ha khappud bad ha kaba khatduh la shu shim rai ba ki jaka ka Meghalaya kiba ym dei ban leit sha Assam ki la shah pynhap sha ka jylla Assam.
Kitei ki nongïalam ki la kynnoh ruh ba u Myntri Rangbah ka jylla bad ka sorkar MDA ka la lilam ïa ki jaka jong ka Jylla sha Assam bad ka daw hi ka long ba shuwa ban shim ïa ka rai ba khatduh kim shym la ïaid lyngba ki paidbah bad kito kiba tip bha halor u pud u sam khamtam ki nongsynshar Raid bad ki Hima.
Ki la kynthoh ruh ba u Myntri Rangbah ka jylla u la thok ïa ki paidbah ha kaba um shym la ïaid katkum kaba u la dep ba kren sha ki paidbah ba halor kane ka kam pynbeit pud ka sorkar kan ïaid shuwa na ka sur ki paidbah bad kaba sngewlyngngoh ka long ba ki paidbah pat kim tip satia tad haduh ba la dep ban ïa soi ïa ka MOU ba la ati sha u Myntri ka tnad ka kam pohing ka sorkar kmie.
U Bah Roikupar Synrem u la ïathuh ruh ba katkum ka RTI ba la wad jingtip da ka HYC, la shem ruh ba ha u snem 2011 hapoh kata ka Sector – 6 ki shnong kiba don ha ka thaiñ Bakhlapara ki ki dang dei hapoh ka jylla Meghalaya, hynrei kaba sngewsih pat ka long ba kum ka Shnong Jimbrigoan bad ka Shnong Lyngkhung la pynhap noh sha ka Assam ba ka seng ka dawa ba dei ba pynduh pyndam biang ïa katei ka MOU ba la dep ïa soi bad ban ïa bishar thymmai halor kine ki kam pynbeit pud.
Shuh shuh, kitei ki nongïalam ka HYC ki la dawa ruh na ka sorkar jylla ba dei ba pynduh pyndam shuwa ïa katei ka MOU ba la dep ïa soi hadpeng u Myntri Rangbah ka jylla bad u Myntri rangbah ka Assam ryngkat u Myntri ka tnad ka kam pohing ka sorkar kmie da kaba ong ruh ba wat ïa ka riti synshar ka ri dang lah ba pynkylla bad kan dang don jingeh aiu ban pynkylla biang ïa kane ka MoU ba la dep ïa soi halor kane ka kam pud ka kam sam ba ka jylla Meghalaya ka la duhnong ba bun ki jaka ba dei hok jong ka Meghalaya ki la leit noh sha Assam na ka daw ba ym don kata ka jingbishar bñiah shuwa ban shim ïa ka rai kaba khatduh, la bynrap kitei ki nongïalam ka HYC.