Khlem ai jingkheiñ ka NPP ïa ki jingpynlut por election, buh rieh ïa ki jingdon jingem hakhmat ka ECI : AITC

Shillong, Risaw 3 : Ka Liang Pyrshah All India Trinamool Congress (AITC) ka la kynnoh ba ka National People’s Party (NPP) kaba ïalam ïa ka jingsynshar ka khlem ai jingkheiñ satia ïa ki jingpynlut pynsep jongka ha ka por election sha ka Election Commission of India (ECI) bad nalor kata kala thok la shukor ruh halor ki jingdon ki jaka puta jongka kumba la paw ha ka Audit Annual Financial Report ba ka la phah sha ka ECI.
“ Kane ka jingbym ai jingkheiñ bad kane ka jingpyrshang ban buhrieh ïaki jingdon ki jaka puta ne ki ophis jongka ka pynpaw shai kdar ba ka NPP ka kwah ban buhrieh ïa ki jingdon jingem jongka ym dei tang na ki paidbah hynrei wat hakhmat ka ECI ruh “ ong u nongpathai khubor ka AITC u Saket Gokhale.
U Gokhale u la byrngem ruh ba ka AITC kan dawa na ka ECI ban phah tohkit halor kane ka jingbuhrieh jongka NPP ïaki jingdon jingem jongka namar kam long kum ka kaiphod ba ka la ai sha ka ECI.
Ka jingkheiñ ba la dep Audit ba la ai da ka NPP sha ka ECI ka dei na ka bynta u snem 2020-21 kata kat haduh ba kut ka 31 tarik Lber 2021. Kat kum katei ka jingai jingkheiñ ka NPP ka la pynpaw ba ka don ka jaka ba 1.31 lak tyngka kat haduh u Lber 2020. Nangta kat haduh ka 31 tarik Lber 2021 ka NPP ka don ki jingdon jingem 69.66 lak tyngka. Nangta kat haduh ka 31 tarik Lber 2021 ka NPP ka pynpaw ba ka hap ban siew bai wai haduh 8.28 lak tyngka bad shisnem shwa kane la pynpaw ba ka dei 5.26 lak tyngka.
Hadien kata hapdeng ka 31 tarik Lber 2020 bad 31 tarik Lber 2021 ka NPP ka la pynpaw ba ka la ïoh ïa ka jaka 10,000 Sq.ft na ka tnad Revenue jongka sorkar jylla ban shna ïa ka ophis jongki hajan Polo.
Ha kajuh pat ka por ka NPP ka la plie ïaka ophis ba thymmai jongka ha Tura ha u 2020-21 bad kumjuh ruh ha u juh u snem la plie ruh ia ki ophis jongka ha Imphal bad Manipur.
Haba ka AITC ka kdew ïa kine ki jingshisha ka la pynartatien ïa ki paidbah namar u Gokhale u la pynpaw ba ka NPP kat haduh ka 31 tarik Lber 2021 ka la don lai tylli ki ophis kaba 10,000 Sq ft kaba hajan Polo, ka ophis ha Tura bad Imphal.
Nalor kata u Gokhale ula pynpaw ruh ba ka NPP kat kum ka kaiphod ba ka la ai sha ka ECI ka la pynpaw ba kine ki jaka ba ka don ki shong dor tang 69.66 lak. U la ong ka dor mynta ha ka thaiñ Golfink bad Polo ka long hapdeng ka 5.5 hajar haduh 10 hajar tyngka shi Square phut kumta tang kane ka ophis ba 10 hajar square phut ruh ka la long lypa 5 haduh10 klur tyngka. Ka long ka bym lah ban pdiang ba ki lai tylli ki ophis ha Shillong, Tura bad Imphal kin shondor tang 69.66 lak, ong u Gokhale.
U Gokhale u la ong shuh shuh lada ka NPP ka kam ba ki ophis ha Tura bad Imphal ki dei kiba ka shu wai bad ka dor ba siew ka long 8.28 lak tyngka shisnem ka mut 69,000 tyngka shisbnai. Ka long ka kambah lada baroh ar tylli ki ophis ha Tura bad Imphal ka bai wai kan long tang 69 hajar tyngka shibnai.
Kumta u Gokhale u la kynnoh ba ka la paw shai ba ka NPP ka buhrieh im im peit peit ïa ki jingshisha baroh halor ki jingdon jingem jongka bad ka la shu ïalam bakla ïa ka ECI.
U la kynnoh ba ka NPP kat haduh mynta kam pat ai jingkheiñ sha ka ECI ïa ki jingpynlut pynsep jongka ha ka por election MLA 2018 ha ka jylla ha ka jingshisha ïa ki jingpynlut pynsep dei ban phah sha ka ECI hapoh 75 sngi naduh ba la kut ka election.
Kumta u la kynnoh ba kane ka sorkar MDA ba laïialam da ka NPP ruh ka dei ka sorkar kaba bamsap ha baroh ki liang bad kiba la paw pyrthei ki long kum u Dome ka Assembly, ki kam thied kali ha ka tnad pulit, ki smart meter, saubhagya scheme bad ka jingïabam sap ka long da ki spah spah klur tyngka. U la ong “ Ngi la kob ban ïatai niah paidbah hapdeng ka NPP bad TMC hynrei kim nud satia namar ki tieng ïoh shah sei madan kine ki kam bamsap bam phong jong kane ka sorkar lym kumta ki la dei ban ïatai nia ban paw ki jingshisha hakhmat ki paidbah lada kim don ei ei ban buhrieh” pynkut u Gokhale.