Haduh 3 ngut ki MLA kynthup 2 na NPP ban ïakhun na tiket BJP ha u 2023, kam ki heh BJP

Shillong, Risaw 03 : Ka BJP kaba dei kawei na ki party synrop ba donlang ha ka sorkar Meghalaya Democratic Alliance ka la kam ba tad haduh kane ka sngi ki la don haduh lai ngut ki MLA na kiwei ki party kiban wan ban aireng noh na ka party ha ka elekshon MLA kaban long ha u 2023.
Ki tyllong khubor na ka party ki kynthup ïa uwei u MLA ka Trinamool Congress na East Khasi Hills bad arngut pat ki dei na ka seng National People’s Party na rilum Garo.
“Watla bun ki la tip ïa ka kyrteng jong kitei ki MLA hynrei na ka liang ka party ngim pat kwah satia ban pynpaw pyrthei namar ka por ka dang don sa kumba katto,” ong u heh ka BJP.
Katkum ka jingïathuh jong u, ka jingïakren ka dang ïaid mynta sa bad ki katto katne ngut ki MLA bad lada ka jingïakren ka seisoh ki lah ban ïoh kham bun shuh shuh ki MLA ban ïakhun na ka tiket jongka party ha katei ka elekshon.
Lah ban kdew hangne ba ka lyer elekshon 2023 ka la sdang ban shongshit bha ha ka jylla khamtam ha kito ki party heh kiba thaw ïa ka sorkar MDA kum ka NPP, UDP bad kiwei kiwei. Don ruh ki party kiba ap ka jingma ba baroh ki MLA ki lah ban phet lut sha kiwei pat ki party kumba ka jia mynta ïa ka Congress, KHNAM bad HSPDP.
Tangba kane ka la jia lang ruh wat ïa kiwei ki party kum ka Trinamool Congress, PDF bad kiwei kiwei.
Dang shen na ka liang ka NPP ka la kam ba na ki 23ngut ki MLA jong ka, kin don pat sa kumba 8 haduh 10 ngut ki MLA na kiwei pat ki party kiba kwah ban ïakhun na ka tiket NPP ha u 2023. Kitei ki heh NPP ki la kam ruh ba ki don haduh lai ngut ki MLA ba shah sospon ha ka Congress ban ïakhun noh na ka party, nangta 2ngut na ka TMC, arngut na ka PDF bad uwei na ka HSPDP nalor kiwei kiwei kiba ka jingïakren ka dang ïaid.
Kane ka jingkam ka la ïaid ruh ha ka sem UDP kaba la kam ba kin don bun ngut bha ki MLA na kiwei ki party kum na ki MLA ba shah sospon ha ka Congress, MLA shimet, na ka HSPDP bad ruh na ka TMC bad kiwei kiwei.