Shallang, Nailar, 20: Kawei ka par dewiong ha West Khasi Hills District, ka la twa hynnin ka janmiet, ha kaba uwei na ki nongtih par u la ïap hajuh bad uwei pat u la mynsaw jur. Kane ka jingjia ka la jia ha ka par dewiong kaba don ha ka shnong Urak Riangdim kaba hap hapoh ka Shallang Police Station, West Khasi Hills.
Katkum ka khubor ba ïoh, kane ka jingtwa ka la jia hynnin ka step bad ar ngut na ki nongtih tih par ki la shah taplup ha kane ka jingtwa. Kine ki ar ngut ki kyrteng u Lependro Sangma ba 34 snem bad u Hendid Momin ba 33 snem, kiba dei na ka shnong Uguri, (Goraimari) kaba hap hapoh ka Kharkutta Police Station.
U Lependro Sangma u dei u ba ïap ha kane ka jingtwa ka par, katba u Hendid u la mynsaw jur. Haba pynthikna ïa kane ka jingjia, u Superintendent of Police ka West Khasi Hills Bah H.G Lyngdoh u la pyntip ba u la phah ïa ka kynhun ki Pulit Ophisar ba kypang sha kane ka jaka ban pynlong ïa ka jingtohkit halor kane ka jingjia.
Kane ka par ka dei kaba don sha kyndong bha bad kaba hap ban ïaid da ka kjat katto katne kynta namar ka surok ruh ka long kaba sniew bha. Hynrei ka khubor na ki pulit kiba la poi sha katei ka jaka, la ong ba kane ka jingjia ka dei kaba shisha bad na ka liang ki pulit ki la shimkam halor kane bad ka jingtohkit ka la ïaid shkhmat.
