Shillong, Nailar, 20: U Myntri khynnah ka tnad kam pohïing ka sorkar pdeng u Ajay Kumar Mishra mynta ka Sngi Thohdieng u la ong ba ka sorkar pdeng ka dang thaw lad bad bishar bniah na ka bynta ki lad jingïada ïa ki jaidbynriew riewlum kane ka thaiñ khamtam ha kaba ïadei bad ka jingdawa ban pyntreikam noh ïaka Inner Line Permit (ILP) ha kane ka jylla.
“ Kiei kiei ki jingeh kiba don hakhmat ngi la pyrshang ban thaw lad ban pynbeit ïa ki. Ha kine ki phra snem ngi la trei ban kyntiew ïa kane ka thaiñ namar kata ïa kiba sahteng ruh shen ngin sa lah ban pyntreikam noh” ong u Mishra.
Ha u 2019 ka ïing Dorbar Thawaiñ ka jylla ka la mynjur da ka Resolution ban dawa na ka sorkar pdeng ban pyntreikam ïaka ILP ha ka jylla. Hynrei namar ba ka sorkar pdeng kam pat pyntreikam haduh mynta ki seng bhalang ki la rai ban sdang biang da ki jingïakhih ha baroh kawei ka thaiñ shatei lam mihngi .
Halor kane u Mishra u la ong “ ïa mynta ngam pat lah ban batai ei ei ruh namar ka sorkar pdeng ka dang bishar bniah ïa kane ka kam. ïa kino kino ki kam ba dang bishar bniah, ne ïa kino kino ki jingdawa ba don hakhmat kam long kaba dei ban ïathuh lypa ne batai lypa hynrei hadien ba la dep shim rai hangta da ngan ïathuh ïa kiei kiei ruh ka la biang eh”.
