Nongpoh, Nailar 16: Uwei u samla u la duh noh ïa la ka jingim, hadien ba u la shah tynrah ha kawei ka Scooty katba u dang ïaid lynti ha ka surok bah National Highway-6 ha Ri Bhoi.
Kane ka jingjia ka la jia hynnin ka sngi ha ka por 11.50 mynstep ha Umtrew, ha kaba kawei ka Scooty kaba don ia u number AS 01 DM 0131 ka la tynrah ïa utei u samla katba u dang ïaid lynti bad ha kane ka jingjia utei u samla u la khlad noh hadien ba la poi ha ka jaka ai jingsumar ha CHC Umsning. Une u samla ba la duh noh ia la ka jingim na ka daw ka jingshah tynrah ha katei ka Scooty la tip kyrteng kum u Deeconstar Marbaniang, 25 snem ka rta naka shnong Umtrew ha Ri-Bhoi.
Halor kane ka jingjia, na ka liang ki Pulit ka Ri Bhoi ki dang pynlong ïa ka jingtohkit halor kane ka jingjia bad ban leh katkum ki kyndon jong ka aiñ pyrshah ïa utei u nongñiah Scooty uba la leit ban tynrah ïa utei u samla uba la duh syndon ïa la ka jingim, ong ka tyllong khubor na ki Pulit ka Ri Bhoi.
