Mawkyrwat, Risaw 30 : Ha kawei ka jingjia ba sngewsih kaba la jia ha shnong Rangblang-Pombriew, South West Khasi Hillls District, u wei samla uba ha ki ka rta 19 snem ei ei u la duh ei ïa la ka jingim hadien ba la suba ba u shah bat ha ka bording.
Une u samla la tip kyrteng kum u Jamewellson Thongni 19 snem u la duh ei ia la ka jong ka jingim na ka daw kaba suba ba u shah bat ha ka bording hajan ka iing sah jong u.
Katkum ka jingiathuh da u Secretary ka shnong Rangblang-Pombriew, Bah Bokstone Thongni la ong ba kane ka la jia ha ka step jong ka 30 tarik u Risaw, 2024 hadien ba ia utei u samla la lap da ki khynnah shnong katba ki dang leit tam soh-ot ha kawei ka jaka hajan ka khlaw shnong.
La iathuh ruh ba mar kumta hi, kita kiba lap ki la pyntip noh ha ki bor shnong bad ïa une u samla la pynkit wut wut sha Civil Hospital Nongstoiñ ha kaba la pyntip ba une u samla u la khlad noh.
Namarkata, na ka liang ki bor shnong jong ka Rangblang-Pombriew ki la pynpaw ka jingsngewsih bad sngewbitar ïa ka ophis MePDCL Mawkyrwat Division ba ka dei ban leh ei ei halor kane ka jingjia bad kyrpad ruh ïa ki bor bahalor ban tuklar lem halor kane ka jingjia.
La iathuh ba na ka liang ki bor shnong bunsien ki la dep ban pyntip ha ka ophis ba dei peit ïa ka bording ba ki don bun bha ki post elektrik kiba la tor, da kaba kyrpad ba kin wan ban peit ïa ki hynrei kim shem la patiaw ei ei.
Ki ong ruh ba ka long kaba sngewsih ba kane ka la jia ha kane ka sngi haduh ba utei u samla un duh ei ia la ka jingim. U Bah Bokstone u iathuh ruh ba trai jong une u dieng post bording la ïohi ruh ïa ki mrad kum ki risang, ki khnai kiba la ïap ha katei hi ka jaka.
