Shillong, Ïaiong 21 : U Nongsharai ba hakhlieh duh jong ka Balang Katholik ha ka pyrthei, u Pope Francis u la khlad noh ha ka step sngi Nyngkong ha Vatican ha ka rta kaba 88 snem, hadien ka jingshitom kaba la bat ïa u la katto katne por.
Ïa ka khubor halor ka jingkhlad noh jong u Pope Francis la pynbna da ka Vatican lyngba u Cardinal Kevin Farrell ha ka por 9:45 baje mynstep.
“Hynmen para baieid, da ka jingsngewsih kthang, nga pyntip ïaphi ïa ka jingkhlad noh u Kpa Bakhuid Francis ha ka por 7:35 baje mynta ka step….” ong u Cardinal Kevin Farrel ha ka jingpyntip paidbah.
Ha kajuh ka por, na ka liang ka synjuk ki Bishop jong ka Ri India hapohi ka shatri jong ka Conference of Catholic Bishops of India (CCBI) kala ïam briew halor ka jingkhlad noh jong u Nongïalam Rangbah jong ka Balang.
Ha ka kyrwoh sngewlem, ka CBCI ka la ong, “Ka jingkhlad noh jong u, ka la long ka jingduh kaba ym lah shuh ban batai ïa ka Balang hi baroh kawei.”
Nangta la ong ruh ba kum u Nongsharai ba shitrhem jong u Blei, u Pope Francis ula aiti ïa ka jingim jong u ban pynsaphriang ïa ka Gospel bad u dei ruh u nongïakhun ba radbah na ka bynta ka hok jong ki duk ki rangli bad kiba shah iehnoh bein bad ban khot ban wer ïa ka pyrthei ban pdiang ïa ka jingsngewrit, ka hok bad ka jingburom lang para briew.
“Ka pateng jong u, kum u Nongmihkhmat jong u Petrus, Nongsharai ka Balang naduh u snem 2013 haduh u 2025 kan ïai neh bad ïai rhem shi rta. Ka jingthrang jong u ban trei na bynta ki duk ki rangli bad khamtam na ka bynta ki poiwir, ka la pynlong ïa u ban ioh ïa ka jingïaroh na ka pyrthei shi tyllup,” bynrap biang ka kyrwoh na ka CCBI.
Shuh shuh la ïathuh ba ha ka kyrwoh sha ki Bishop ka India kiba kynduh lang haka 36th CCBI Plenary Assembly ha Bhubaneswar ha u Kyllalyngkot 2025, u Kpa Bakhuid u la kyntu ïa ki ba kin buh hakhmat eh ban trei na ka bynta kiba duk bad kiba tlot bor.
