Shillong, Nailur 12: U Bah Latiplang Kharkongor, uba ki paidbah ki ju khot ieit u Bah Heh, uba long u MDC ka Nongthymmai u la khlad noh mynta ka janmiet ha Civil Hospital Shillong hadien ka jingpang kaba la bat slem bha ïa u.
U Bah Latiplang, u la long MDC la saw sien lynter ha kaba u la jop nyngkong eh ha u snem 2004. Ha kine ki 20 snem, u la bat ruh kum u EM jong ka Trade, ka Elaka bad kiwei. U la bat ruh shipor ïa ka kam CEM, tangba ka sorkar MDA kam shym la ai jingmynjur pat ïa ki EM kiban don ha ka Executive Committee jong u.
Ki nongkyrshan jong u kiba la wan sha Civil Hospital ki la pynpaw ka jingsngewsih bad ka jingsngew bynnud halor kane ka jingkhlad noh jong u, namar ka rta jong u ka dang biang ka bha ban shakri paidbah. La pynkit ïa ka met jong u na Civil Hospital sha iing sha Nongthymmai hapdeng ka jingsynran kiba haiing, ki paralok ki parajor bad ki nongkyrshan jong u.
Da kane ka jingkhlad noh jong u Bah Latiplang, ka Khasi Hills Autonomous District Council (KHADC) ka la duh noh ïa ki 2 ngut ki Senior Member jong ka Council tang hapoh 3 bnai haba u Bah Teinwell Dkhar, MDC ka Shella u la khlad noh ha ka 24 tarik u Jylliew 2024.
