Nongpoh, June 4: Ha kawei na ka jingjia sngewsih jong ka jingïatyngkhuh kali, kawei ka samla kaba dang 25 snem ka rta ka la duh noh ïa la ka jingim, hadien ba ka kali Hyuandai Alcazar ka la leit tynrah ïa kawei ka trok kaba dang ieng ha Shangbangla, ha ka jingpyrshang ban knieh ïaid shakhmat ïa kawei ka kali.
Kane ka jingjia ka la jia ha ka por 4.44 baje mynstep ha kaba katei ka kali kaba don ïa u Number AS-01-EV-9578 ka dang hiar na Shillong ban leit sha Guwahati bad kynsan kynsan ka la leit ban tynrah ïa ka trok kaba la pynlong ïa katei ka samla ban duh noh ïa la ka jingim, na ka jingmynsaw jong ki bynta jong ka khlieh.
Kane ka samla kaba la duh noh ïa la ka jingim, ka dei kaba la tip kyrteng kum ka Namrita Borah, 25 snem ka rta bad kaba shong basah ha Kamargaon, Golaghat, Assam.
Ïa katei ka kali Hyuandai Alcazar la ñiah da u MD Ismail Hoque Choudhury, 33 snem ka rta na Haripur, Darang District, Assam. Kiwei pat kiba la ïa don lang ki kynthup ïa u Anyatul Watus, 39 snem ka rta na Guwahati, ka Gayatri Borah, 25 snem ka rta na Mangaldai, Assam, ka Pragya Dihingia, 29 snem ka rta na Sonari, Charaideo, Assam bad u Meriganka Borah, 26 snem ka rta na Golaghat, Assam.
Kumba la ioh lum jingtip na ki Pulit ka Ri Bhoi, la ong ba ïa katei ka samla ba la khlad noh la rah noh mardor da kawei ka kali sha Civil Hospital Nongpoh, hynrei hadien ba la poi ha katei ka jaka ai jingsumar ki Doctor ki la pynthikna ba ka la dep khlad lypa. Katei ka Kali Hyundai Alcazar ka la julor na ki bynta ba tynrah ïa ka trok.
Shuh shuh, la ong ruh ba ïa ka met jong katei ka samla la rah noh sha ka jaka buh metiap ha Civil Hospital Nongpoh ban pyndep ïa ka postmortem examination bad ki pulit ki dang pynlong ïa ka jingtohkit kaba bñiah halor kane ka jingjia.
