Nongpoh, Naitung 18: Ka long ka khubor kaba kyndit bad kaba pynsngewsih ym tang ïa ki khun ki hajar kiba hap hapoh ka Raid Nongtung ha Ri Bhoi District bad ka jingkhlad ba kyndit noh u Paiem Miwel Shadap, uba dei u Syiem ka Raid Nongtung ka la pynkyndit ruh ïa kiba bun balang ha ka District bad ha ka jylla hi baroh kawei kumba ka paw ba u dei uwei na u Syiem uba ju kren na ka bynta ban ïa khun ïa u pud u sam ba hap hapoh ka Raid Nongtung kiba don mar syndah bad ka jylla Assam.
Kumba la ioh lum jingtip mynta ka sngi, u Paiem Miwel Shadap u la khlad noh mynta ka sngi (18 Naitung 2023) ha ka por 9 baje ei mynstep ha ka ïingsah jong u ha Ka Shnong Umpowin Pdeng ha Ri Bhoi bad kaba dei ruh hadien ba ka jingpang jingshitom la ban la katto katne por.
Kum ban pynkynmaw, u Paiem Miwel Shadap, u dei u Syiem ka Raid Nongtung ba hap ha ka Hima Khyriem Syiemship ha Ri Bhoi District bad kumba la ju paw pyrthei une u Syiem u dei uwei na u Syiem uba ju kren ïa ki jingeh ki paidbah khappud ba hap ha ka Raid Nongtung (Block II) bad uba la ju kren ruh ban pan ka jingïada ba kyrpang na ka sorkar Meghalaya halor ki jingshah pyndik ki paid khappud bad khamtam ban ïada ïa u pud u sam ka Raid Nongtung ba hap ha ka jylla Meghalaya.
Kumba la ioh lum jingtip, halor kane ka jingkhlad noh une u Syiem ka Raid Nongtung, kiba haïing hasem bad ki khun ki kti jong u, kin pyndep noh ban tep don burom noh ïa ka met ba dang sah jong u ha ka 20 tarik u Naitung 2023 ha ka por 11.30 baje mynstep ha u Lumg Jingtep ka Balang Presbyterian Umpowin.
Khyndiat haba kren halor kane ka jingkhlad noh une u Syiem ka Raid Nongtung, u Paiem Miwel Shadap ka la wan rah shisha ka jingduhnong kaba khraw ïa ki khun ki hajar jong ka Raid Nongtung, namar u dei uwei u na u Syiem uba shlur uba ju kren ïa ki jingeh ki paidbah khamtam bun ki shnong kiba hap ha ka Raid Nongtung ki don ka jingïaknieh jaka hapdeng ka Meghalaya bad ka Assam ba une u syiem u ju kren beit ïa ki jingshisha ba katkum ki kot ki sla kiba bun hi ki jaka khappud ki dei ha ka jylla Meghalaya.
Ha ka por ba u dang im bad dang don ha sla jong kane ka pyrthei u la dei ruh uwei na u Syiem uba ju kren na ka por sha ka por ïa ki kam pud ki kam sam bad ki jingshah pyndik ki paidbah ha khappud ha ka sorkar Assam bad haba phai halor kane ka bynta u tip kham bha ruh ïa ki pud ki sam lyngba ki kot ki sla ban pynshisha bad kane ka jingkhlad ba kyndit noh jong u ka la long ruh ka jingduhnong khamtam mynta ba ka jingïapynbeit pud ha ka wat kaba ar ka dang don hapdeng ka jingïakren hapdeng ka sorkar Meghalaya bad ka sorkar Assam.
