Khang tala ka CoRP ïa ka Karkhana saiñ jri ha Mawsmai, Khanapara

Nongpoh, Nailar, 20: Ka Confederation of Ri Bhoi People (CoRP) ha ka sngi Thohdieng ka la leit ban khang tala syndon ïa kawei ka Karkhana saiñ Jri kaba don ha ka Shnong Mawsmai ha ka thaiñ Khanapara, kaba dei hadien ba ka seng ha ka jingleit jurip ka la kynnoh ba katei ka Company kam don satia kano kano ka kot ka sla ban pynïaid kam ïa katei ka Karkhana ba la long trai da uwei u bar jylla.
Kane ka Karkhana ba la leit khang tala da ka Confederation of Ri Bhoi People (CoRP) ka dei ka Karkhana ba la tip kyrteng kum ka Resource Rubber Private Limited, kaba don ha ka shnong Mawsmai bad ka dei ruh ka Karkhana kaba saiñ bad pynmih ïa ki jri (Rubber).
Haba leit ban khang tala ïa katei ka Karkhana la ïalam da u Working President, u Bah Pateng Myrsing ryngkat ka jingdon lang u Vice President, Juban June Swer, Finance Secretary, u bah Shining Kyntla bad kiwei kiwei ki dkhot jong katei ka seng.
Haba kren bad ki Nongthoh Khubor, u Working President ka CoRP, u Bah Pateng Myrsing, u la ong ba ka kum ka seng ka la shim ïa kane ka rai ban leit khang tala ïa katei ka Karkhana, ka dei halor ka nongrim ba kam don satia kino kino ki kot ki sla bad haba leit ban jurip ban pan ïa ki kot ki sla ruh ki bor pynïaid katei ka Karkhana kam shym la lah ban pyni ba ka la biang ïa ki kot ki sla.
U la ong ruh ba ka seng kam kwah ba ki bar jylla kiba wan sha kane ka jylla kin seng kam seng jam da ki Karkhana bapher bapher bad khlem da pynbiang pat ïa ki kot ki sla bad kumba la lap ka seng kane ka Karkhana saiñ jri ka la shu pynïaid ïa ki kam khlem da don ki kot ki sla.
Shuh shuh, u la ong ruh halor kane ka bynta, ka seng hadien ba la ïa kynduh ïa ki bor pynïaid katei ka Karkhana ba kim lah ban pynbiang ïa ki kot ki sla ka la shim ïa ka rai ban khang tala shuwa shipor bad katba katei ka Karkhana kam pat lah ban pynbiang ïa ki kot ki sla ka seng kan nym ailad ban shu wan seng kam seng jam khlem da don ki kot ki sla ba ki dei ban ïoh bor na ki bor ba dei peit jong ka sorkar, u la bynrap.