Jowai, Naitung 29: U District Magistrate ka West Jaiñtia Hills ula pynmih ïa ka hukum katkum ka kyndon Section 144 Cr PC kata ban ïada katba lah ïa ki sawdong sawkun jong ka Mariang bad kumjuh ïa ki jingthaw ban im naduh ki mrad ki mreng bad ki dohum dohwah kiba don ha baroh kawei ka District.
Kane ka hukum kan khang pyrshah ban khwai dohkha da kaba pundonkam da ki dawai bih, ki bom (dynamite) namar kane ka lah ban ktang ïa ki dohum kiba im ha shi lynter ki Wah hapoh ka District.
Ha ka juh ka por la khang pyrshah ban siat kali harud jong ki wah, kane ka hukum kan treikam naduh mardor tad haduh ban da pynbna da kumwei pat.
