Khang kdong ki pulit ANTF ïohkem syndon ïa ki snar khaïi drok ha West Khasi Hills Distrik

Nongstoiñ, Nailar 13: Hadien ka jingtip kaba bniah bad jingbuddien, ki pulit ka Anti Narcotic Task Force ka West Khasi Hills, ha ka sngi palei ki la ïoh ban kem ïa ki snar bah ha ka kam ban khaïi ïa u drok kylleng ka sor Nongstoiñ.
Kine ki kynthup ïa u Teilang Lyngdoh Nonglait 35 snem ka karta na ka shnong Sohlait bad u Pynkmenlang Kharjahrin 31 snem na Themiew Nongstoiñ, ha kaba ki pulit ki la ïoh jingtip ba ki wanrah ïa u drok na ki District ba marjan. Ïa baroh kine ki ar ngut la ïoh jingtip ba ki leit ki wan lyngba ka kali taxi kaba don ïa u number ML-05 W 2576.
Na ka liang u Superintendent of Police Bah H.Kharkongor u la ïathuh ba mar ïa ïoh jingtip bran bran ki ophisar bad pulit jong ka ANTF West Khasi Hills ryngkat ki pulit ka Nongstoiñ Police Station, ki la pynlong ïa ka jingkhynra bad ap khang kdong na ki lad bad ki surok kiba pynïasoh sha West Khasi Hills.
La ong ba haba poi ha ka shnong Nongjyllieh, kitei ki runar mar ïa ïohi ïa ki pulit ki la pyrshang ban phet, hynrei na ka liang ki pulit ruh ki la beh thong bad hadien katto katne por la ïoh ban bat ha shnong Tynrongladew ka shnong kaba don ha lynti jong ka surok Nongstoiñ-Nongkhum.
Watla la ïoh ban pakhang lynti ha katei ka jaka, hynrei la ong ba uwei na kine ki runar kata u Teilang Lyngdoh Nonglait, u la ïoh ban phet krad na ka kali. Hynrei ki pulit ruh khlem aili ki la kthong bad ïoh ban bat noh ïa u. Ym tang katta hynrei la ong ba utei u runar u la ïohlad ruh ban bret ïa u song polythene ha ka por ba u phet, tangba la ïoh ban tam biang hadien ba u la hap ban ïalam hi sha ka jaka ba u bret.
U SP u la ïathuh ba ha utei u polythene bag la lap ïa u kynja song ba la buh bha shapoh ïa u drok Heroin u ba khia 10.81 gram. Nalor nangta sa uwei pat u song ba la lap na ka met jong u Teilang Lyngdoh Nonglait, u dei u drok Heroin ba khia 0.09 gram.
Katba na ka met jong u Pynkmenlang Kharjahrin, la lap ïa u juh u kynja song u ba hadien ba la test la lap ba u dei hi u juh u drok Heroin ba khia 0.07 gram. Ïa kine ki drok na kine ki runar la ïohkem markhmat ruh ha ka jingdonlang ki nongsakhi.
Kiwei kiwei pat ki tiar ba la ïoh kurup ki long ki thyrnia injek bad ka pisa, ha kaba la kurup noh. Nalor nangta ruh ki pulit ki la ïoh kurup ruh ïa kumba phra tylli ei ei ki kynja jingsong drok kiba thylli na ïing sah jong u Teilang Lyngdoh Nonglait.
Kumba long mynta baroh ar ngut kine ki runar nongkhaïi drok kiba snar tam ha ka thaiñ, ki don ha ki kti jong ki pulit bad la pynngat ruh ïa ki ha ki kyndon jong ka NDPS Act ha Nongstoiñ PS.