Shillong, ïaïong 18: Ka Voice of the People Party (VPP) ka pynpaw ka jingsngewkmen ïaka jingnoh mynsiem jong ki paidbah sha ka parti. Ha ka jingsngew ieit bad khamtam bad ka jingangnud jongki ban nang pynkhlaiñ shuh shuh ïa ka Parti, la mih bun ki ba shna ïa ki WhatsApp Group bapher bapher.
U nongaiktien jong ka Parti, u Dr. Batskhem Myrboh, u la ong ba naka liang ka Ophis jong ka Parti ka sngewdei ban kyrpad ïa ki paidbah ban kiar tyngeh ban shna ïa kum kine ki WhatsApp Group namar ki lah ban pynmih jingeh ki bym sngewtynnad ïaka Parti.
Kumta ka kyrpad ia baroh ban pynkut noh ïa ki kum kine ki group ba la dep shna bad ban kiar na ka ba shna thymmai ïa ki. Dei tang kito ki ba la ai bor da ka parti ki ba lah ban shna ïa ki Whatsapp group ne ki wei pat ki social media group ha ka kyrteng jong ka Parti. U la ong ruh ba ïa kane la donkam ban leh namar ka jingdonkam ban wanrah ïa ka jingryntih (discipline) ha ka rukom treikam ka Parti bad ban nym ailad ïaka kynrum kynram kaba lah ban mih na ki riew shim kabu.
Shuh Shuh, ka Parti kan nym shim ïa ka jingkitkhlieh lada jia ei ei ka ba sniew na ki social media group ki ba shna ha ka kyrteng ka Parti ki ba shna klem da ïoh jingbit na ka Ophis jong ka Parti.
