Shillong Lber 05: U Superintendent of Police jong ka East Khasi Hills mynta ka sngi Baar, ula pynbna ban khang ïaid ïa ki kali heh sha Sohra bad Mawphlang ha ka 8,9 bad 10 tarik mynta u Bnai naduh ka por 6 baje mynsstep haduh ka por 11 baje mynmiet.
Ula ong ba kane ka jingkhang ban ïaid ki kali heh ka dei namar ba kan don ka Monolith Festival ha Mawphlang ha ka 7, 8 bad 9 tarik u Lber bad kan don ruh ka Jingiaseng jong ka KJP Synod Sepngi kaba 22 ha ka naduh 7 tarik haduh 10 tarik u Lber ha Laitryngew, Sohra.
Namar ba ki don kitei ki prokram ïa kaba la khmih lynti ba bun bah ki briew bad ki kali kin poi na kylleng ki District, kumta la pyrkhing ban ïaid ki kali heh ne Heavy Vehicle ban leit sha Sohra bad Mawphlang khnang ba kan ym don ka jingthut ka ïaid ka ïeng kiwei ki kali kiba leit sha kitei ki prokram.
Hynrei la shah pat ban ïaid tang ïa ki kali kiba donkam kyrkieh ne ki Emergency Service Vehicles.
