Kham pynstet noh ïa ka rukom thung kam, kyntu ka FKJGP ïa u heh MPSC
20 hajar kiba aplai na bynta san tylli ki kam ba lait
Shillong, Naiwieng 21 : Ki nongïalam jong ka FKJGP ha ka sngi Nyngkong ki la leit ban kynduh ïa u Chairman jong ka Meghalaya Public Service Commission chairman, u Bah Paul Reader Marweiñ ban kyntu ïa u na ka bynta ban pynstet pyndap ïa ki kam kiba lait thylli ha ki tnad bapher bapher jong ka sorkar jylla.
U President jong ka FKJGP Bah Dundee Khongsit haba kren bad ki lad pathai khubor hadien ka jingïakynduh, u la ïathuh ba na ka liang u heh ka MPSC u la pyntip ba ka don ka jingpynslem na ka bynta ban pyndap ïa ki kam kiba lait namar ki don haduh kumba 20,000 ngut ki nongwad kam kiba aplai na ka bynta saw ne san tylli ki kam kiba lait.
Shuh shuh u la ïathuh ba ki la ai jingmut ruh ba ka sorkar jylla ka la dei ban buh noh da ka Information Technology (IT) cell ban pynstet ïa ka jingphah ïa ki application.
U President u la ïathuh ruh ba kumba long mynta hi, ka rukom thep kam ha ophis MPSC mynta ka long beit markhmat da u briew bad kumta ka la long ka daw kaba shim por bha. “Ngi la ai jingmut ruh ïa u Chairman ba dei ban ring video haba don interview namar kane kan ailad ïa ki kyrtong ba kin pynhun ïalade lada jia ba kim sngew ïahap ïa ka result.”
La ïathuh ruh ba na ka liang u Chairman ruh u la kular ba un sa bishar ïa katei ka jingai jingmut ban don ïa ka jingring video ha ka por interview ban pyntikna ïa ka jingleh hok bad ruh khnang ba ki samla wad kam kin don ka jingshaniah ha ka rukom ïakhun kam.
Kawei pat kaba utei u nongïalam ka Seng u pynpaw ka long ba ka dawbah kaba ktah lut ïa ka rukom thung kam ban pyndap ïa ki kam kiba lait thylli kadei eh na ka jingwan ka khlam COVID ha u 2019.
Nalorkata la ïathuh ba u Chairman u la pyntip ba ka Commission ka la sdang ban pynstet ïa ka eksam kam da kaba pynlong ïa ki written test bad ruh ïa kiwei ki interview ha kitei ki kam ba lait thylli ha u Rymphang bad Lber mynta u snem.
Kawei pat ka jingeh kaba utei u nongïalam u ïathuh ba ka Commission ka kynduh kadei hadien ka jingbthah na ka High Court ban pyntreikam noh ïa ka roster system.