Shillong, Naiwieng 19 : Ka Meghalaya ka la lah ban ïalehkai bha ha ka sngi sdang ha ka jingmih madan kaba laisien ha ka U-19 Cooch Behar Trophy pyrshah ïa ka Jammu & Kashmir ha ka jingïalehkai hynne ka sngi Saitjaiñ ha Mangaldai, Assam. Da kaba pynhap lut baroh ki wicket jong ka J&K bad ai kamai tang 296 ron hadien ba ka Meghalaya ka la kam ban kawang bol nyngkong da kaba jop ïa ka jingkynting pisa, ka Meghalaya ka la kamai haduh 5 ron ha ka shi over haba beh ïa ka thong da kaba kamai 63 ron duh noh 2 wicket bad kaban sa tied biang, ka dang shah lamkhmat da 233 ha ka inning kaba nyngkong.
U Mrinal Das u khyrwit phra tylli ki four ha ki 27 bol bad kamai 40 ron, hynrei u la shah pynhap wicket noh hashwa ban kut ka jingïalehkai hynne ka sngi. U Mrityunjay Bharali u kamai 17 ron (not out). Shwa ban beh shim ka pali tied, u Navin Kumar Ray u khur 4 wicket ai kamai 66 ron bad u Bosrang R Marak 3 wicket ai kamai 60 ron, kiba dei ki arngut ki rangkawang bol ba khur bun wicket na bynta ka Meghalaya ha kane ka sngi. U Jeremiah Lyngdoh Kynshi (1/2) katba u Bharat Gurung 1/45 bad u Das 1/29.
