Mawkyrwat, ‘Naitung 09: Ka Hynñiewtrep Integrated Territorial Organization (HITO) ryngkat ka Hynñiewtrep Youths Council (HYC) bad ka Synjuk ki Seng Samla Shnong (SSSS) jong ka South West Khasi Hills District da ka jingïaitrei shitom ryngkat ka jingthmu ban rat dyngkhong ïa ki jingsniew khamtam ïa u drok hapoh ka thaiñ Mawkyrwat ki la ïoh ban kem biang ïa ki lai ngut ki briew kiba la suba ba ki dei kiba la im kyrni ban dih drok.
Ha ka jingkhynra, na ka met jong ki lai ngut kiba la shah kem la lap ïa u drok bad ki thyrnia injekshon.
Katkum ka jingïathuh jong u President ka HITO Bah Paul Thyrniang ïa ki lai ngut la ïohbat ha ka jingap pynshrip ha miet shiteng synñia jong ka sngi saitjaiñ.
Ki nongïalam jong kine ki lai tylli ki sengbhalang ki la pynpaw ïa ka jingsngewdiaw ha kaba watla ki la trei shitom ryngkat bad ki bor synshar shnong ban rat dyngkhong ïa u drok hynrei napdeng ki lai ngut ki nongdih drok kiba la shah bat uwei na ki u dei uba la shah kem teng ha ka HITO.
Kine ki lai seng ki la kyntu ïa ki kmie ki kpa ba ki dei ban ïa shimkhia bad ki sengbhalang da kaba tyrwa ruh ba lada don ki jingeh ban sneng ïa ki khun ba kin kylla bamut ne ban ïalam ha ki jaka sumar na ka liang jong ki lai seng ki long ba kloi ban wad da ka ram ka shah ban phah sumar ha ki Rehabilitation Centre khnang ba kin kin lait noh ka jingkyrni dih drok.
Ïa ki lai ngut kiba la shah kem la aiti noh sha ki bor synshar jong ka shnong Mawkyrwat.
