Shillong, Nailar, 03: Ki Pulit ka Shillong Sadar Police Station ki la ïohkem ïa uwei u snar nongtuh uba donkti rung jubor ha kawei ka ing ha Umsohsun, Shillong ha kaba u la bom klep bad lute ïa kawei ka longkmie kaba la tip kyrteng kum ka Kong Janaki Toi, 70 snem ka rta.
Kane ka la jia ha ka sngi Sngi Saitjaiñ, 29 tarik u Naitung, 2023 ha ka por kumba 6:45 baje janmiet ha kaba une u runar u la phut jubor ïa ka sati ksiar na kti, bad lute ruh ïa ka ATM Card bad ïa ka Mobile Phone.
U Superintendent of Police jong ka East Khasi Hills u Bah Sylvester Nongtnger ha u kyrwoh ba la phah sha ki lad pathai khubor u la ïathuh ba ki Pulit ki la register case hapoh Shillong Sadar Police Station hapoh ka kyndon 452/326/392 Indian Penal Code.
Ha ka jingtohkit, la lap ba uwei u briew uba sah ha Mawblei uba la suba ba dei uba donkti ha kane ka kam runar.
Ha ka sngi Baar mynta ka taiew, ki Pulit ki la leit khynra ïa ka ingsah jong utei u runar bad ha ka jingtohkit, u la phla ba u dei uba donkti ha kane ka kam runar bad ïathuh ruh ba ïa ka sati ksiar u ladep die lilam sha uwei u Bania ha Mairang.
Mar mar ki Pulit ki la hiar sha Mairang ban kurup ïa ka sati ksiar bad ïa u runar uba donkti la kem noh mardor bad la tian bishar ïa u ha Kashari.
