Shillong, Naitung 26 : Ki Pulit ka East Khasi Hills, ki la ïoh ban kem haduh 7 ngut ki snar nongtuh thuk thuk bad ïoh ruh ban kurup ruh haduh 4 tylli ki Pulsar kiba la rong tuh na East Khasi Hills District.
Kat kum ka jingpyntip ki Pulit, 3 ngut na kine ki nongtuh la ïoh ban kem na Amlarem, 3 ngut la ïoh kem na Pynursla bad uwei la ïoh kem na Shallang.
U Superintendent of Police ka East Khasi Hills Bah Sylvester Nongtnger u pyntip ba ki Pulit ka Mawngap Police Station ki la ïoh pdiang ïa ka ejahar ha ka 15 tarik Naitung ba shah tuh kawei ka thuk thuk ML05-P-6045 na Umlympung, 12 Mer, Mylliem bad mar mar ki la register case bad pynlong ïa ka jingtohkit.
U pyntip ba halor ki khubor syntiat, ki Pulit kila pynlong ia ka jingapshrip ïa kine ki nongtuh bad la ïoh ban kem ïa lai ngut na Amlarem ryngkat bad la ïoh kurup ruh ïa kane ka thuk thuk na shnong Padu, Amlarem.
U pyntip ba nalor kine ki laingut, ki Pulit ki la kem ruh sa lai ngut pat ki runar na Pynursla kiba ïadonkti lang ha kane ka kam tuh thuk thuk.
U Bah Nongtnger u pyntip ba ha ka jingtohkit shuh shuh, ki Pulit ki la ïoh ban kurup biang sa kawei ka Pulsar 150 na Amlarem bad kawei pat ka Pulsar 220 na Pynursla, ki bym shym la don satia ïa u nombor plate bad hadien la pynthikna ba kine ki thuk thuk ki dei kiba tuh na Amlarem bad Pynursla.
Nalor kane, u pyntip ba ha ka 25 tarik pat, ki Pulit ka Laban kila ïoh pdiang ïa kawei ka ejahar ba shah tuh ka Pulsar 150 cc ba don u nombor ML05-V-0993 na Lower Harisabha, Laban.
U ïathuh ba halor ki jingïoh khubor, ki Pulit ki la ïoh ban kem ïa uwei u runar na Shallang bad ïa kane ka thuk thuk ruh la ïoh ban kurup na katei ka jaka.
Ki Pulit kila kurup ruh noh ïa kine ki thuk thuk lem bad ïa kawei ka Alto 800 ba don u nombor AS01-DH-2009 kaba la pyndonkam da kine ki runar ha ka ban leh ïa kane ka kam bymman.
U Superintendent of Police u pyntip ba ki dang don ki briew ba donkti ha kane ka kam kiba la phet rieh mynta bad ka jingthwet ka la ïaid shakhmat ban ïoh kem ïa ki.
