Shillong,Naitung 26 : Ka sorkar jylla ka la phah jingthoh biang sha u Vice Chancellor ka NEHU ban pyntip ïa u ba kiba bun ki college hapoh ka jylla kim pat kwah ban pyntreikam ïa ka National Education Policy (NEP) 2020 naduh mynta u snem.
Haba ïakren bad ki lad pathai khubor u Myntri ka tnad pule puthi u Rakkam A Sangma u la ïathuh ba u la ïathuh ïa kane ruh ha ki nongïalam ka NEHUSU kiba la wan ban ïa kynduh ïa u mynta ka sngi.
U la ïathuh ba ka sorkar jylla ka la ïoh pdiang ïa ki shithi na ki 43 tylli ki college bad na kine 33 tylli ki dei kiba la pynpaw ba kim pat long kloi ban pyntreikam ïa ka NEP naduh mynta u snem.Halor kane ka sorkar ka la dep phah jingthoh sha ka NEHU la lai sien lai wat kata ha ka 17 tarik Jymmang, 27 tarik Jylliew bad ha ka 25 tarik Naitung.
“ Ngi la pyntip sha ka NEHU ba ki College jong ngi kim pat long kloi ban pyntreikam ïa ka NEP naduh mynta u snem bad na kata ka daw kiba bun ki kyrpad ban pynkynriah bad sdang naduh u snem ban wan” ïathuh u Rakkam.
U la ïathuh ba ki college kiba heh ha ka jylla ki la rai ban pyntreikam noh ïa ka NEP naduh mynta u snem. U la ïathuh ba la don bun sien ki jingïakynruh hapdeng ka NEHU bad ki bor ka tnad pule puthi bad kumjuh ruh bad ma u halor kane ka kam. Ka jingïalang kaba dang shen ka dei ha ka 4 tarik Naitung 2023 ha kamra u Chief Secretary u D.P Wahlang. Ka NEHU ka la mynjur ban pyntreikam ïa ka Policy da kaba ailad ïa ki College ba kin jied hi.
“ Ngi la dep bthah ïa u VC ka NEHU ba un lum da ka jingïalang bad baroh ki bor pynïaid jong ki College bad hadien kane ka jingïakynduh ka University ka la ai jingmut ban pyntreikam da kaba ailad ha ki college ban jied ne ka hybrid mode. Kaba mut kito kiba kwah ban pyntreikam ki lah ban pynïaid shakhmat bad kito kiba ym pat kwah ki lah ban sdang noh naduh u snem ban wan ruh” ïathuh u Myntri.
Haba la kylli, u Myntri u la ïathuh lada kito ki college kiba ym sdang ban pyntreikam ïa ka NEP naduh mynta u snem, ki samla pule kiba pule ha kito ki college kiba kwah ban leit pule shabar kin ym ïoh admission ( rung class) namar kiwei ki jylla kim pdiang ïa kito kiba ym pat pyntreikam ïa ka NEP.
Na ka liang ka NEHUSU lyngba u Finance Secretary jongka u samla Mandor Diengdoh Swer u la pynpaw ba ka Seng kam pyrshah ïa ka NEP hynrei ban pyntreikam naduh mynta u bnai Nailar kan buh ïa ki samla pule ha ka jingeh.
