Shillong, Naitung 14: Ha ka jingïakhun pyrshah ïa ki kam khaïi drok ka kynhun pulit ba kyrpang jong ka South West Garo Hills District ki la ïoh ban kem ïa lai ngut ki nongkhaïi drok ha Borkona kaba hab hapoh jong ka Ampati Police Station bad kurup haduh 11,000 tylli ki kuli Methamphetamine Yaba.
Kine kiba la shah kem ha ki pulit ki long u Mostafa Sheik, 24 snem, u Meter Ali, 32 snem bad u Nur Abdin, 24 snem, kine baroh kidei na ka jylla Assam, na kine ki pulit kila ïoh ban kurup 11,000 Methamphetamine tablets (Yaba) ha kaba ka jingkhia ka long 1.06 kilograms, la ïoh kurup lai tylli ki mobile phone, ar tylli ki bike.
Ki pulit kila register ïa ka ejahar hapoh Ampati Police Station katkum ka kyndon aiñ jng ka Narcotic Drugs and Psychotropic Substances (NDPS) Act, ha kaba ïadei bad kane na ka liang ki pulit ki la ong ba ka jingtohkit halor kane ka kam ka la dang ïaid ban lap shuh ïa kiba don kti bad la kyntu ïa ki paidbah ban ïatreilang ban ïakhun pyrshah ïa kine ki jingsniew.
Ha ka juh ka por na ka liang jong ki pulit ki la kyntu ïa ki paidbah ba lada don kano kano ka jingtip ba ki don ki nongkhaïi beaiñ kin sngewbha ban pyntip sha ki pulit ban lah ban pynduh ïa kane ka jingkhaïi beaiñ kaba sniew.
