Shillong, Rymphang 10: Ki shipai Border Security Force (BSF) ka Meghalaya Frontier, ha ka sngi nyngkong ki la ïoh kem ïa uwei u nong Assam uba dang wan rung tuh na Bangladesh lyngba ka khappud ka East Khasi Hills District.
Une u briew u dei uba na Hojai Assam, ong ki shipai BSF ha ka khubor ba la pyllait, haba pyntip ba ki BSF ka 4Bn ki la ïohi ïa ka jingwan rung tuh une u briew bad mar mar ki la khynra bad ïohkem ïa u.
Ïa une u briew ba la wanrung tuh la aiti noh sha ki Pulit ka Pynursla Police Station ba kin leh ïa kaba donkam katkum ki kyndon jong ka aiñ.
