Shillong, Naitung :Ki dkhot jong ka Seng Ri War Development Organization (RWDO) ha ryngkat ka jingïatreilang bad ki shipai Border Security Force (BSF) ki la ïoh ban kem noh ïa laingut ki khar Bangla ki ba donkti ha kaba tuh dieng na ki bynta khappud ka Bangladesh kiba hap hapoh ka shnong Nongjri Tishang Pungdiengïong ha kane ka sngi Saitjaiñ ba la lah.
Kane ka jingjia ka la wan long ruh hadien ba ka Seng ka la pynpaw ka jingsngew khia kaba jur hadien ba kala ïoh pdiang ïa ki jingujor na ki nongshong shnong ka thaiñ Nongjri bad Tishang halor ka jingwan rungtuh ba khah khah jong ki khar Bangla sha ki bri ki bsah kiba don ha kine ki thaiñ khappud India bad Bangla desh kiba hap ha Nongjri Tishang Pungdiengïong ban ban wan pom tuh ïa ki dieng ki siej, ki dieng kwai bad kiwei kiwei pat ki mar rep bad kiba ju wan ban dusmon ïa ka rep ka riang ha kine ki thaiñ nalor ka jingbyrngem byrsit ïa ki nongtrei bri.
Na ka liang ki nongshong shnong ki ïathuh ruh ba kim ju nud ban leit bri tang marwei ne ar ngut namar ka jingtieng ïa ki khar Bangla ki ba ju wan rung tuh da ki kynhun ryngkat ki tiar pynmynsaw.
Kumta halor kitei ki jingud jingnam jong ki paradoh parasnam ka Seng marmar ka la leit ïakynduh ïa ki heh BSF kiba dei peit ha kitei ki thaiñ ha ka 8 tarik mynta u bnai bad ha kane ka jingïakynduh kaba seisoh na ka liang ki BSF ki la kular ban ai ka jingïatreilang ryngkat ryngkat bad ki nongshong shnong kumjuh bad ka Seng na ka bynta ban wanrah ïa ka shongsuk shongshngaiñ ha katei thaiñ bad ban teh pyrkhing ïa kane ka jingïoh lad ki khar Bangla shapoh u pud u sam ka Ri India.
Ka Seng ka la pynpaw ba hadien kane ka jingïalang ki la ïaid lynti lymba ka surok khappud ba la ker sainar ban leitphai sha la ïing, hynrei kynsan kynsan ki la ïohi ïa ki khar Bangla kiba thmu ban wan rungtuh sha u pud u sam jong ka Shnong Tishang Nongjri lymba ki thliew muri ba don jingkieng (culvert).Kumta ka seng mardor ka la pyntip sha ki BSF kiba don hajan kane ka jingkieng khnang ban khanglad ïa kine khar bangla ba kin ïoh rung sha u pud u sam kane ka Ri Khasi.
Ha ka jingïakren bad kine ki BSF ki la ïathuh ha ngi ba ki don ki khar bangla kiba tuh dieng bad pom dieng sha pdeng khlaw ka bri Tishang Pungdiengïong, kumta mar mar ki dkhot ka Seng kila leit wad bad rung sha pdeng khlaw ha kaba kila ïoh kem noh ïa lai ngut ki khar bangla kiba pom tuh ïa ki dieng kwai, dieng met kiba ki la thmu ban pynkie lymba ki wah kiba tuid sha Bangladesh.
Ha ryngkat ka jingïatrei lang bad ki shipai BSF la ïoh ban kem noh ïa kine ki kahr bangla bad la kurup noh ïa ki dieng kiba ki la pom.Na kine la ïoh ruh ban kurup ïa ki lai tylli ki wait bad la aiti noh ïa kine ki lai ngut sha ki bor Pulit da ki shipai BSF ha ryngkat ka jingdon lang ki dhot ka Seng na ka bynta ba kin leh ia kiba donkam.
Na ka liang ka Seng kala phah ruh ïa u kyrwoh sha ka sorkar kmie lyngba ki shipai BSF ba ka sorkar kan pyndep noh kham kloi ïa ki jingker sainar shiah bad ruh ban buh noh da ki CCTV camera ha ki thaiñ khappud khnang ba yn lah ban teh lakam ïa ka jingwan rungtuh ki khar bangla sha u pud u sam ka Ri India.
Kumta na ka liang ka Seng ka ai khublei ïa ki shipai BSF, ki Pulit, ki ba la shimkhia kloi kloi ban kem noh ïa kine ki lai ngut ki khar bangla kiba wan ban tuh ban thiem ïa ki jingdon jingem kiba don ha ki bri ki bsah jong ki nongshong shnong kane ka thaiñ. Kane ka long katkum u kyrwoh lyngba u Bah Tensing Khonglah President bad Bah Donlang Nongbri General Secretary RWDO Nongjri Circle.
