Shillong, Jylliew 23: Ki Pulit ka Anti Narcotics Task Force (ANTF) ki la ïoh kem ïa 4 ngut ki nongkhaïi drok na ki artylli ki jaka ha Shillong bad kitei kiba la shah kem la iathuh ba ki dei kiba sah ha Them Metor.
Na ka liang ki Pulit ka ANTF bad ki Pulit ka Mawlai Police Station, ki la ïoh kem ïa arngut ki nongkhaïi drok kiba la pynthikna ba ki dei na ka Them Metor ha ka jingkhynra ha ISBT, Mawïong. Kine ki arngut ki kyrteng u Ram Singh ba la 29 snem ka rta bad u Vijay Singh ba la 20 snem ka rta.
Na kine ki arngut, ka ANTF ka la ïoh kurup ïa 9 tylli ki synduk sabon ba thep ïa u drok ba 110.32 gram, artylli ki mobile phone bad kawei ka scooty Aprilla ba khlem don nombar plate.
Ha kawei pat ka liang ki pulit ka ANTF ha ka jingkhynra, ki la ïoh kem ïa arngut ki nongkhaïi drok na ka thaiñ Demthring kaba hab hapoh ka Madanrting Police Station. Kine ki arngut ki kyrteng ka Evanjelyne Thongni, 30 snem na Lapalang bad u John Robert Kharmyndai 22 snem na ka shnong Nongkyndong.
Ka ANTF ka la ïoh kurup ïa kawei ka synduk sabon ba la thep ïa u drok ba khi a11.43 gram bad artylli ki mobile phone, kawei ka scooty kaba don u nombar ML05-L-7620.
