Nongpoh, Naiwieng 19: Kawei ka ïing ka la jan shah bamduh ha ka ding, kaba dei hadien ba mynta ka sngi kawei ka ïing ar mala ka la kem ding kynsan bad la suba ka lah ban kem ding na ka thud ka bording ilektrik.
Kane ka jingjia ka la jia mynta ka sngi ha ka Shnong Erpokon ha Ri Bhoi kumba ha ka por 10 baje ei ei mynstep, ha kaba katei ka ïing ar mala ka la kem ding bad ha kane ka jingjia kiba bun ki paidbah ki la wan ban ïarap na ka bynta ban pynlip ïa ka ding bad kim shym la lah ban leh ei ei.
Dei lyngba ka jingwan poi ka kali pynlip ding na Fire & Emergency Service, Nongpoh, ba la lah ban pynlip noh ïa ka ding kaba la klang ha katei ka ïing ar mala.
Kumba la ïoh lum jingtip, la ong ba kane ka ïing ka dei ka ïing jong ka Kong Delbi Nonglang, ha kaba ki la shu ai wai ha ha ki Malwari ba buh dukan ha Erpokon bad kane ka jingjia ka la pynlyngngoh namar ba kim pat tip satia ïa ka daw ka jingkem ding katei ka ïing ha kaba ki la shu suba beit na ka jingthud ka bording ilektrik.
Ha kane ka jingjia, kiba bun ki tiar ki tar, ki jingdon jingem hapoh katei ka ïing ki la kylla dpeit ha ka mala kaba hajrong bad ka mala ba nyngkong pat kam shym la ktah ei ei,kaba dei na ka jingwan poi kloi ki kali pylip ding kiba la synreit da ka um ba la lah ban tem noh ïa ka ding ba kan nym pur sha katei ka mala ba nyngkong bad lait noh tang katei ka mala ba haneng kaba la jot bad shah pynjot ha ka ding.
Halor kane ka jingjia, ki Pulit pulip ding ym tang ba ki la ïarap ban wan pynlip ïa ka ding bad ki la pynlong ruh ïa ka jingtohkit halor ka daw jong ka jingkem ding katei ka ïing bad kumba long haduh mynta kim shym la lap ïa ka daw tynrah kaba la suba beit ka lah ban dei na ka jingthud jong ka bording ilektrik.
