Kem bad pynshitom ïa kiba pynjulor ïingmane ha Chattisgarh, dawa ka Congress na ka Sorkar Pdeng

Shillong, K’Lyngkot 04 : Ka Congress ha ka sngi Balang ka la dawa na ka sorkar pdeng bad ruh ïa ka sorkar Chattisgarh ba ki dei ban kem bad pynshitom ïa kito ki briew kiba donkti ban pynjulor ïa ka iingmane dang shen ha Narayanpur district jong ka Chhattisgarh.
Haba kren bad ki lad pathai khubor ha Congress Bhavan, u Nongai ktien ka Congress, Bah Ronnie V Lyngdoh u la ong ba kane hi ka paw ba kadei ka jingthombor ïa ki khristan rit paidbah.
“Kumta ngi kyntu ïa ka sorkar pdeng bad ruh ïa ka sorkar Chattisgarh ba kin pynshitom bad kem lut ïa kiba donkti ha katei ka kam katkum ki kyndon aiñ,” u la ong.
Ha kajuh ka por u ong ruh ba ki phah ka khubor sngewlem sha kito kiba la ngat ha katei ka jingshah thombor bad pynrem ruh ïa kito kiba nud ban leh ïa katei ka kam thombor.
“Ngi kyrpad ïa u Myntri Kampohiing ka Ri, u Amit Shah ba dei ban pynshitom ïa kiba donkti bad ngi kyrpad ruh ïa u Myntri Rangbahduh ka Ri, u Narendra Modi ban ai ka jingïada ïa ki khristan bad ki rit paid ba kin ïoh ïa ka jingïada katkum ka Riti Synshar jong ka Ri,” u la bynrap shuh shuh.
Da kaba pyntip ba ki la dep ban phah ruh da ka email sha u Myntri Rangbah ka Chattisgarh ban dawa pynshitom bad kem ïa kiba donkt, u Bah Ronnie u la ïathuh ba ka party kan sa thoh ruh sha u Myntri Rangbahduh ka Ri halor kane ka jingjia.