U briew u ïai don beit ka mynsiem ban da leh ïa kano kano ka kam, u da kwah beit ban da pynjot, ban khlem da pyrkhat shuh ïa kiwei, ne ïa ka jingmyntoi naka bynta kiwei. Ka jingpynïap beiñ ïa ki doh-wah, ka dei kawei na ki nuksa haba kwah te kwah eh ban bam, pynban ka mynsiem kam hun ban bam noh tang ne khwai iwei ne ar, pynban da ban da dusmon tad haduh ba kiwei ruh kim lah shuh pat ban ïoh ban bam ïa ki.
Ki doh um ki doh wah, lah ban ong ba kïadei kiba jyllei bha ha kiba bun ki wah bah ne ki wah rit jong ka jylla, ha kaba ka jingdon ka jong ki, ka khring bha ïa kiba bun ki rawon, kiba man ba ïoh ka por, ki her sha ki wah, ban shong ban khwai baroh shi sngi. Ha ka jingim u rawon ne u nongkhwai, ym don eiei kaba hun tam ha ka mynsiem lada ïoh ïa I dohkha I ba tang shi tda, pynban jah thait jah jrem ka met ba shong bad shah ïa ka shit ka thang ka sngi, ba shon ba bom u sïap u phrla, hynrei haba rung ha ïa ïing,da kwah shisha ban pynheh ïa ka khana, ba katno tam ki dohka kiba heh hynrei kiba ïa ïait noh. Hynrei lada jla pat ba brut ne bym ïoh kata ka nang pynskuiñ shuh pat ïa ka mynsiem ïa u rawon ba tang ïoh por un hlar blang sha wah naka bynta ban ïoh pat ban pynhun ïala ka jong ka mynsiem ïa kaei kaba ïa dep ban jla.
Ka jingim u nongkhwai haba ïa kyrni lei lei ïaka, da shisha ka long pat kaba itynnad, namar ka jingim jong kine ki briew, dei kaba ki im ryngkat ryngkat bad ka marlang, namar haba ki leit man ïa ka por, ka marlang ka ai shibun bah ka jingnang ka jingtip ïa ki, kum haba wan kiew kynsan ka um, ki tip ba don ka jingjur bha u sïap na sha kiwei pat ki jaka, da kumta ki tip ruh da kumno ba kin nang ban klar noh pat ïaïade ban ïait na ka jingma, nalor kata ka jingim ki nongkhwai ka wanrah ruh ïa ka met kaba koit kaba khïoh, namar haba leit sha ki wah, ka ja ruh da bang bha, ka jingmut ka jingpyrkhat ka jong ki ka ïait shi por na ka jingbun palat ka kam kaba ki trei ki ktah man ïa ka sngi.
Pynban ha ka mynsiem u riew dusmon kaba ïaïade ruh ym lah shuh ban bam, ïa kiwei pat ruh ym aïlad ber lih da bih, kaba pynïap beiñ pat ïa ki dohum, kiba lada aïlad ïaki ba kin im beit ha ki wah, lehse kin da lah ha kaban nang pynkha roi ïa kiba bun ki dohkha bad ba ki um ki wah kin dap kyrhai da ki har rukom ki dohum, kiba khring pat ïa ka mynsiem ba brai jong ki rawon. Ban tehïakam ïa kum kane ka kam dusom ka long kaba eh, namar ba u briew hi na ïade shwa u donkam ba un sngewthuh ïa ka jingkordor ka jingdon ki dohum ha ki wah. Ka nuksa kat kum ba ïa mih ha ka kot khubor ïa ka jingjla ha ka Wah Umtung ha Ri-Bhoi, haba khmih bad ïa ki dur, da I bynnud bad I pangmet haba shem bad ïohi ïa ka jingïap ei ki dohkha ha ki rud wah,. Kaba ha ka jingshisha, lada dei baym leh dusmon, lehse kiba bun ki rawon ne ki nongtong ïa ki dohkha, kin jin da ïa ïoh ban dait ne ban tong ïa ki ban ïoh ban bam pat ha ïa ïing ha ïa sem.
Kumta, kaei kaba donkam ka long kum ki para briew donkam ban ïa pynsngewthuh mar kyldlang, ha kaba donkam ruh ban ïa syllok lem para briew da kumno ban nym rung palat ka mynsiem ban shu leh kput ne ban shu dusmon. Nalor kata ka por ruh ka ïa donkam ïa ki bor shnong, ba kin shim khla noh shi syndon haïade, ban thaw ïa ki aiñ ki kanun shnong ban lah ha kaban khanglad ïa ki riew dusmon ba kin nym mlien shuh hsa kaban ïap beiñ ïa ki dohum.
Ki aiñ ne kanun ka long ba lada ïap ha ka sien ba nyngkong donkam ban da shaiñ da ka kuna pisa kaba heh, hynrei lada ki dang ïai bteng ne ïap ba ki leh blang ïa ka juh ka kam, donkam ban aiti beit ïa ki sha ki bor jong ka aiñ, khnang ba kin ngat ha ka jingshah pynshitom kiba kham jwat.
Naka dlang ka sorkar, wat lada kam lah than eh ba kan shna ïa ki aiñ kiba tyngeh, pynban ka donkam ba kan thaw ïa ki lad ki lynti ban lah ha kaban khreh ban shimti shipor haïade naka bynta ban lada ïa ki dohum ba don ha kiba bun ki wah ha kane ka jylla, da kaba shimti shipor haïade, ka sorkar ka lah ha kaban theh shuh shuh ki bun jait ki symbai dohkha, khnang ban lah ha kaban nang pynkha roi shuh shuh ïa ka jingdon ki dohum ha ki um ki wah.
Hynrei ka kam ban ber dawai bih ïa ki dohkha ha ki um ki wah ka ïa donkam ban sangeh noh shi syndon bad ha ka juh ka por donkam shisha ban shim khla naka bynta ban phrlang pat ïa ka khubor ka jingdonkam ban pynneh bad ban pynsah ïa ki dohum, namar ka jingdon ka jong ki ym tang ba ka khring ïa ki rawon hynrei ka larap ruh ha kaban pynkhuid ïa ki um ki wah, namar ba ki dohum haba ki im ha ki wah, ki jingbam ba ki bam baroh kïadei kiba larap ban nang pynkhuid ïa ki jaboh jong ka um, kaba u briew u lah lang ha kaban pyndonkam pat ïaka.
