Kawei pa kawei ka constituency ka dei ban kdew ïa ka jingdon ki nongthep vote : LO

Shillong, Naitung 10 : Hadien ba bun ki MDC ki dawa ba dang donkam ban peit bniah bha shwa ïa ka kaiphod pynbeit constituency thymmai ba la leh da ka Delimitation Committee (DC), ka Dorbar Lyiur jong ka KHADC ha ka sngi Balang ka la mynjur ban phiah shwa sha ka Select Committee (SC) ïa kane ka kaiphod khnang ban ïoh peit sani bad bishar bniah biang shwa.
Kane ka Select Committee jong Council hapoh ka jingïalam jong u Deputy CEM, Bah PN Syiem kum u Chairman kan peit bniah biang ïa ka kaiphod jong ka Delimitation Committee khnang ba yn ym don shuh ki constituency kiba heh bad rit shilliang.
Shwa ban shim ïa kane ka rai, kiba bun ki MDC kynthup naduh u Nongïalam ka Liang Pyrshah, nangta u MDC ka Nongpoh Bah Balajied Rani, Bah Lambor Malngiang, Bah Latiplang Kharkongor, Bah Gabriel Wahlang ki la pynpaw ba donkam ban bishar bniah bha shwa ïa kane ka kaiphod sha ka Select Committee.
Kumta, nalor u Deputy CEM kum u Chairman, ka Iing Dorbar ka la jied ruh ïa u Nongïalam ka Liang Pyrshah, Bah Titos W Chyne, Bah Jambor War, Bah Bindo M Lanong bad Bah Lambor Malngiang kum ki dkhot nalor u Secretary ka Legislative kum u Member Secretary.
Shwa kane, haba shim bynta ha kane ka jingïatai, u Bah Titos u la ong, “Kaba khatduh kadei ka Iing kaban ai ïa ka rai halor kane khamtam haba ïadei bad ka jingphiah ïa ki constituency. Te hynrei haba peit ïa kane ka kaiphod baroh la ïatip ba ka jingwanrah ïa ka Delimitation Committee kam dei ban wanrah constituency thymmai hynrei ban peit ïa ka jingbun ki nongthep vote na kawei ka constituency sha kawei pat.”
U ong ruh ba katkum ka jinglap jong u, ha katei ka kaiphod ym shym la kdew ïa ka jingdon ki nongthep vote. “Ha ka jingshisha kawei pa kawei ka constituency kadei ban don bad ka Delimitation Committee ka la dei ban kdew ba ka Mawsynram ka don katno, ka Nongstoin ka don katno, ka Sohra ka don katno khnang ba mangi kum ki dkhot ka Iing ngin ïoh ban peit hangno ka constituency kaba duna…” u la ong.
Shuh shuh u ong ba ki kwah ban pynshai ba baroh hi ki kwah ba kane ka kam kan dep noh khnang ba kin ïoh noh ïa ka elekshon MDC.
Katba na ka liang u Bah Gabriel Wahlang, MLA/MDC ka Nongstoiñ u la ong ba ha ka elekshon MDC ka jingdon ki nongthep vote ka kham bun ban ïa ka elekshon MDC bad ong ruh ba ka jingdon ki nongthep ka kham heh pynban mynta ban ïa kaba mynshwa.
Katba na ka liang u MDC ka Nongthymmai, Bah Latiplang Kharkongor u la ong ba khnang ba ka jingpynbeit kan long kaba janai donkam shwa ban bishar bniah da kaba phah sha ka Select Committee.
Hadien kane, na ka liang u Deputy CEM u la ong ba na ka liang ka Select Committee kan pynstet kloi katba lah ban pynrung biang ïa ki jingai jingmut ha ka Iing lyngba ka Special Session.
Dei hadien ka jingïatai jong kiba bun ki MDC ba na ka liang u Chairman ka Council, Bah Lamphrang Blah u la pynbna ba la thaw ïa ka Select Committee kaban khlieh da u Bah PN Syiem, Deputy CEM kum u Chairman.