Jowai, Nailar 13: Ka lama lai rong jong ka ri kala kaweh ha manla ki thliewïing kiba don ha sor Jowai, ïa kane la shakhi mynta ka sngi ba ki paidbha nongshong shnong kila shim bynta lang ban pynher ïa ka lama ka Ri bad kumjuh ha ki ophis sorkar bapher bapher.
Kane ka jingpynher ïa ki lama ka Ri ka long shi bynta na ka jingrakhe ïa ka jingïoh laidluid ka Ri kaba 75 snem ne ka “Azadi Ka Amrit Mahotsav” bad ïa kane na la liang ka sorkar kala kyntu ïa ki nongshnong shnong ka ri ba kin ïasnohkti lang.
Kiba bun na ka ïing briew ha Jowai kila pynïeng ïa ka lama lai rong ka Ri ha ki bynta ba ïohi briew bad ki don ruh kiba pynïeng ha tnum ïing ba shalor duh kaba la pynitynnah shuh shuh haba ka lama lai rong ka Ri ka dang kaweh.
Ha manla ki dong la sahkhi baroh ki rympei ïing kila pynher lut ïa ka lama ka Ri, ym don shuh wat tang kawei ka ïing kaba ïaid lait ïa kane bad ka la pynphuh pynpeing kumjuh ïa ka shnong ka thaw kiba ki don ha ki dong bapher bapher ha Jowai.
Kane ka jingpynher lama kala sdang naduh mynta ka sngi 13 tarik tad haduh ka 15 tarik u Nailar, 2022 kaba dei ka sngi rakhe ïa jingïoh laidluid ka Ri na ka jingshah shynshar ha ki phareng kaba 75 snem. Ha Nongbah Jowai ïa kane ka sngi yn rakhe ha madan Jrisaleiñ ba la pynïaid da ka ophis jong u Deputy Commissioner ka West Jaiñtia Hills District.
Ha kane ka sngi yn don shibun ki prokram naduh ka jingpynher ïa ka lama, ka jingïaid Parade, ka jingrwai National Anthem, ki rwai bad shad tynrai, ka jingsam khusnam, ka jingleit ai sngewbha sha ki Children Home, katba ha ka por janmiet kan don ka jingïalehkai Phutbol Phainal Under-17 Independence Day Cup ha madan Kiang Nangbah Stadium hapdeng ka kynhun ïalehkai jong ka Luti Tuber pyrshah ïa ka Sialung Ialong haka por 1 baje nohphai sngi.
